Samstarf heimamanna í náttúruvernd

1 af 4

Vesturbyggð, Umhverfisstofnun, Náttúrustofa Vestfjarða og landeigandur á Rauðasandi stóðu að samstarfsverkefni um hreinsun strandlengjunnar á Rauðasandi laugardaginn 4. júlí. Verkefnið var auglýst og óskað eftir sjálfboðaliðum af svæðinu til að aðstoða við hreinsunina. Alls tóku 20 manns þátt í verkefninu og þar af 5 sjálfboðaliðar á vegum Umhverfisstofnunar. Tekinn var fyrir austurhluti strandlengjunnar á Rauðasandi við bæinn Melanes, þ.e. frá Sjöundá að Hafnarvogi, samtals um 4 km. Í heildina var safnað saman um 30 m3 af rusli. Mest af ruslinu var tengt sjávarútvegi, s.s. fiskinet, netakúlur, bobbingar og baujur. Þar að auki var mikið af einnota drykkjaumbúðum úr plasti og gleri.

Þetta verkefni er unnið í tengslum við OSPAR samninginn sem Ísland er aðili að. Samningurinn gengur út á verndun hafrýmis Norðaustur-Atlantshafsins, meðal annars með því að draga úr mengun frá landi og uppsprettum á hafi. Á hverju ári berst mikið af rusli í hafið og safnast saman á hafsbotni, úti á opnu hafi eða rekur upp í fjörur. Til að leysa þetta stóra vandamál þarf samstarf allra aðila. Verkefnið gengur m.a. út á að skrá hverskonar rusl við erum að hreinsa úr fjörunum og finna út hvaðan það kemur svo hægt sé að fara í forvarnarstarf og koma í veg fyrir að rusl berist í sjóinn.

Árangurinn í ár var framar vonum og á næsta ári er stefnt að því að taka enn stærra svæði fyrir og halda áfram þar sem frá var horfið.

Skrifađu athugasemd:



Til baka
Vesturbyggđ - Kt. 510694-2369 - Ađalstrćti 63 - 450 Patreksfirđi - Sími: 450 2300 - Fax: 456 1142 - Netfang: vesturbyggd@vesturbyggd.is