Ályktun bæjarstjórnar vegna samgöngumála

Vesturbyggð
Vesturbyggð
Hér er birt ályktun bæjarstjórnar Vesturbyggðar vegna samgöngumála á sunnanverðum Vestfjörðum.

„Bæjarstjórn Vesturbyggðar lýsir yfir vonbrigðum með ákvörðun innanríkisráðherra um vegabætur á sunnanverðum Vestfjörðum. Með tillögunni um hina svokölluðu D-leið er gengið þvert á vilja íbúa og annarra hagsmunaaðila í fjórðungnum enda hefur leiðinni ítrekað verið hafnað af Vestfirðingum. Fyrir liggur að Alþingi verður að taka fyrir framangreinda tillögu innanríkisráðherra og skorar Bæjarstjórn Vesturbyggðar á alþingismenn að hafna þessari lausn í vegamálum.

 

D-leiðin er fjallvegur um tvo torfæra hálsa og veglagning á nýrri leið mun valda óbætanlegum skaða á náttúru Hjallaháls og Ódrjúgsháls með miklum skeringum í kjarrivöxnum hlíðum. Íbúar á Vestfjörðum hafa lagt áherslu á láglendisleið og þar með styttingu vegalengda og ferðatíma sem aftur lækka ferðakostnað og flutningskostnað sem bæta munu lífsgæði íbúa og starfsskilyrði fyrirtækja á svæðinu. En ekki síður minnka útblástur kolefna í andrúmsloftið.

 

Það er því ófrávíkjanleg krafa að ef D-leið verður tillaga innanríkisráðherra þá verði framkvæmdir á göngum undir Hjallaháls settar strax í forgang. Að öðrum kosti mun tillaga ráðherra leiða til þess að íbúar á sunnanverðum Vestfjörðum búa áfram við skerta samkeppnishæfni samfélagsins og fólksfækkun sem ekki sér fyrir endan á.

 

Minnt er á að Vegagerðin, Samgönguráðuneyti, Umhverfisráðuneyti og Alþingi Íslendinga höfðu áður samþykkt hina svokölluðu B-leið sem besta kost í öllu tilliti. Það vekur því mikla furðu að fallið sé frá þeim ákvörðunum."

 

Skrifaðu athugasemd:



Til baka
Vesturbyggð - Kt. 510694-2369 - Aðalstræti 63 - 450 Patreksfirði - Sími: 450 2300 - Fax: 456 1142 - Netfang: vesturbyggd@vesturbyggd.is