Í gær afhentu Bára Pálsdóttir, Björg Sæmundsdóttir og Sigurbjörg Pálsdóttir bæjarstjóra undirskriftalista 661 einstaklings í Vesturbyggð og Tálknafjarðarhreppi, eldri en 16 ára, þar sem mótmælt er fyrirhuguðum tillögum um fækkun ferða ferjunnar Baldurs yfir Breiðafjörð.

 

Þær óskuðu eftir því við Ragnar Jörundssona, bæjarstjóra Vesturbyggðar að hann afhendi samgöngu- og sveitarstjórnarráðherra undirskriftalistana á fundi sem hann á með samgöngunefnd og ráðherranum á morgun miðvikudaginn 21. október í Reykjavík. Umræðuefni fundarins verða samgöngumál á suðursvæði Vestfjarða.

 

Að loknum fundi með samgöngunefnd verður fundur með þingmönnum kjördæmisins. Þar verður einnig rætt um samgöngumál auk þeirra fyrirhuguðu skerðinga á opinberri þjónustu eins og aflagningu sýslumannsembættisins á Patreksfirði, niðurskurð í Heilbrigðisstofnuninni Patreksfirði og fleiri mál.