Inflúensan færist í aukana á höfðuborgarsvæðinu

Svínaflensa
Svínaflensa
Samkvæmt Landlækni virðist sem inflúensan sé aftur að færast í aukana á höfuðborgarsvæðinu en samtímis dregur úr fjölda sýkinga á landsbyggðinni.


Frá 29. júní - 5. október 2009 bárust samtals 1895 tilkynningar um tilfelli með inflúensulík einkenni (ILE) eða staðfesta inflúensu samkvæmt skráningum lækna í rafræna sjúkraskrá. Þar af voru 864 karlar og 1031 konur.

 

Á höfuðborgarsvæðinu jókst vikulegur fjöldi tilfella fram í miðjan september (vika 36). Eftir það dró nokkuð úr útbreiðslunni þangað til í síðustu viku (viku 40). Í síðustu viku varð umtalsverð aukning á inflúensugreiningum, en vikulegur fjöldi inflúensugreininga var sá hæsti hingað til.

 

Flest tilfellin eru í aldurshópnum 15-34 ára en töluvert er af tilfellum hjá fólki á aldrinum 40-59 ára sem greinast með einkenni inflúensu. En eftir sextugt fækkar tilfellum verulega bæði meðal þeirra sem eru með staðfesta inflúensu skv. sýnatöku og þeirra sem koma til læknis með einkenni inflúensu.

 

Svo virðist sem inflúensan nái útbreiðslu í afmörkuðum hópum og gangi nokkuð hratt yfir. Dæmi um þetta eru sýkingar á Grundarfirði sem greindust seinni hluta sumars. Nokkru síðar var töluvert um sýkingar í grunnskólanum á Ísafirði og um svipað leyti greindust mörg tilfelli á Djúpavogi. Sama mynstur má sjá á höfuðborgarsvæðinu en þar berast fregnir um útbreidd veikindi í stöku skólum á meðan minna er um veikindi annars staðar. Líklegt er að inflúensutilfellum fari fjölgandi á höfuðborgarsvæðinu á næstunni.

 

Skráningin í rafrænni sjúkraskrá byggir á sjúkdómsgreiningum sem læknar á heilsugæslustöðvum og sjúkrahúsum í landinu skrá í rafræna sjúkraskrá. Sjúkdómsgreiningin er langoftast byggð á klínísku mati læknis en er í stöku tilfellum einnig staðfest með sýnatöku. Þessi skráning endurspeglar betur útbreiðslu inflúensunnar í samfélaginu en fjöldi staðfestra tilfella með sýnatöku. Til að meta útbreiðslu inflúensu A(H1N1)v 2009 eru gögn frá 29. júní (viku 27) skoðuð, en fyrir þann tíma má gera ráð fyrir áhrifum árlegs inflúensufaraldurs í gögnunum.


Staðfest tilfelli inflúensu A(H1N1)v 2009 á Íslandi
Þann 5. október 2009 höfðu alls 252 manns greinst með inflúensu A(H1N1)v 2009 á Íslandi, sem staðfest var á veirufræðideild Landspítala. Þar af voru 136 karlar og 116 konur. Greinst hafa tilfelli með búsetu á öllum sóttvarnaumdæmum nema í Vestmannaeyjum.

 

Nánari upplýsingar um inflúensuna og útbreiðslu hennar er að finna á vefnum www.influensa.is.

Skrifaðu athugasemd:



Til baka
Vesturbyggð - Kt. 510694-2369 - Aðalstræti 63 - 450 Patreksfirði - Sími: 450 2300 - Fax: 456 1142 - Netfang: vesturbyggd@vesturbyggd.is