Kvikmyndaklúbburinn Kittý stofnaður

Þann 6. desember síðastliðinn var haldinn formlegur stofnfundur kvikmyndaklúbbs í Skjaldborgarbíói á Patreksfirði. Klúbburinn hlaut nafnið Kvikmyndaklúbburinn Kittý.

Hlutverk klúbbsins er að gefa félögum kost á að horfa saman á kvikmyndir sem verða alla jafna ekki fyrir valinu hjá kvikmyndahúsum landsins. Stefnt er kvikmyndasýningum annan hvern miðvikudag og munu félagar skiptast á að velja myndir.

Ekki þarf að vera félagi í klúbbnum til að geta sótt sýningar, þær eru opnar almenningi og eru íbúar allra sunnanverðra Vestfjarða hvattir til að kynna sér þær sýningar sem verða í boði.

Sýningar klúbbsins verða settar fram í dagskrá sem verður auglýst með fjöldatölvupósti og í auglýsingakassa Skjaldborgar. Félagar klúbbsins fá þar að auki tölvupóst með upplýsingum um næstu mynd.

Það er ekki algengt að bæjarfélag af þeirri stærðargráðu sem Patreksfjörður er búi yfir þeim munaði að geta sýnt kvikmyndir í góðu kvikmyndahúsi á borð við Skjaldborg. Lionsklúbbur Patreksfjarðar hefur unnið mjög gott starf við að halda uppi bíósýningum í húsinu en félagar Kittýjar hafa mikinn áhuga á að nýta húsið enn betur. Þannig mun tilkoma klúbbsins ekki eingöngu veita félögum hans tækifæri til að nördast saman yfir kvikmyndum heldur einnig til að nýta húsið betur og leggja nokkrar krónur í kassann. Aðgangseyrir á sýningar verður 500 krónur og mun hann renna óskiptur til Skjaldborgarbíós.
 

Skrifaðu athugasemd:



Til baka
Vesturbyggð - Kt. 510694-2369 - Aðalstræti 63 - 450 Patreksfirði - Sími: 450 2300 - Fax: 456 1142 - Netfang: vesturbyggd@vesturbyggd.is