Móta tillögur um sameiningu sveitarfélaga

Samgöngu- og sveitarstjórnarráðherra og formaður Sambands íslenskra sveitarfélaga hafa undirritað yfirlýsingu um að móta tillögur sem leitt geta til frekari sameiningar sveitarfélaga. Ráðherra mun síðan leggja áætlun fyrir Alþingi til afgreiðslu.

 

Ákveðið hefur verið að skipa fjögurra manna nefnd sem á að meta sameiningarkosti í hverjum landshluta. Henni ber að kynna sér viðhorf sveitarstjórnarmanna og almennings til sameiningar og að því loknu leggja fram um tillögur þar að lútandi, sem lagðar verða fyrir landsþing eða aukalandsþing Sambands íslenskra sveitarfélaga árið 2010 til umræðu og álits.

 

Í framhaldi þessa er stefnt að því að fjallað verði um málið á Alþingi og þar ákveðið hvernig sveitarstjórnarskipan yrði eftir 2014.

 

„Með þessu er verið að kanna möguleika á nýjum aðferðum til sameiningar sveitarfélaga sem til þessa hafa farið fram með frjálsum samningum. Fyrirhugaður flutningur verkefna frá ríki til sveitarfélaga á næstu misserum mun einnig skapa mun öflugri forsendur til stækkunar og sameiningar sveitarfélaga," segir í frétt frá Samgönguráðuneytinu.

 

Kristján L. Möller og Halldór Halldórsson skrifuðu undir yfirlýsinguna í tengslum við samráðsfund ríkis og sveitarfélaga sem haldinn var í dag. Þar var annars vegar var fjallað um stöðu og horfur í búskap ríkis og sveitarfélaga og hins vegar um eflingu sveitarstjórnarstigsins og stöðu þess til framtíðar.

 

Í yfirlýsingunni er minnt á að unnið sé að flutningi á málefnum fatlaðra og aldraðra til sveitarfélaga og nefndir vinni að endurskoðun á tekjustofnum sveitarfélaga og regluverki Jöfnunarsjóðs sveitarfélaga. Einnig segir að aðilar séu sammála um að vinna að eflingu sveitarstjórnarstigsins og að móta tillögur um leiðir til frekari sameiningar sveitarfélaga. „Þá eru aðilar sammála um að leita nýrra leiða til að sameina sveitarfélög og eru vonir bundnar við að með því að leita eftir tillögum í samstarfi ráðuneytis og Sambands íslenskra sveitarfélaga fáist fram raunhæfar tillögur sem samstaða getur orðið um."

 

Frétt af mbl.is

Skrifaðu athugasemd:



Til baka
Vesturbyggð - Kt. 510694-2369 - Aðalstræti 63 - 450 Patreksfirði - Sími: 450 2300 - Fax: 456 1142 - Netfang: vesturbyggd@vesturbyggd.is