Orkudrykkir

Saman
Saman
Síðastliðnar vikur hefur umfjöllum um aukna neyslu svokallaðra orkudrykkja verið áberandi manna á milli sem og í fjölmiðlum. Forvarnaraðilar hafa bent á þessa þróun undanfarið og aukin neysla slíkra drykkja meðal barna og þá sérstaklega unglinga er áhyggjuefni.

Í Reykjavík hafa deildastjórar unglingastarfs tveggja frístundamiðstöðva í samstarfi við grunnskólana í hverfunum vakið athygli foreldra á aukinni orkudrykkjaneyslu barna og þá sérstaklega unglinga. Í Kópavogi hefur neysla slíkra drykkja verið bönnuð í starfi félagsmiðstöðvanna eins og fram kemur í frétt Morgunblaðsins laugardaginn 10. október sl.

 

Á vef mbl.is er jafnframt að finna stutta umfjöllun um erindi sem dr. Jack James, gestaprófessor við Háskólann í Reykjavík hélt á vormánuðum 2009 en hann segir markaðssetningu framleiðenda slíkra drykkja, einkum til unglinga og ungs fólks, jafnast á við markaðsherferðir tóbaksframleiðenda.

 

Í 3. tölublaði Neytendablaðsins sem kom út nú í október er góð umfjöllum um orkudrykki og m.a. sagt frá því að í ógáti hafi innflutningsaðili límt innihaldslýsingu á íslensku yfir varnaðarorð framleiðandans um að neysla drykksins sé ekki æskileg fyrir fólk undir 18 ára aldri. Þar er jafnframt vísað á umfjöllun Matvælastofnunar þar sem sérstaklega er fjallað um orkudrykki.

 

Félag fagfólks í frítímaþjónustu hefur jafnframt áhyggjur af þróun mála og fagnar umfjöllun um málið á sinni heimasíðu www.fagfelag.is.

 

Samanhópurinn hvetur foreldra og aðra til að kynna sér málið og ræða við börn sín og unglinga ef ástæða þykir.

Skrifaðu athugasemd:



Til baka
Vesturbyggð - Kt. 510694-2369 - Aðalstræti 63 - 450 Patreksfirði - Sími: 450 2300 - Fax: 456 1142 - Netfang: vesturbyggd@vesturbyggd.is