Tengslanet vestfiskra kvenna stofnað

Þann 8. október n.k er fyrirhugað að stofna á Ísafirði Tenglsanet vestfiskra kvenna. Tilgangur tengslanetsins er fyrst og fremst að sameina konur á Vestfjörðum, efla samstöðu þeirra, þekkingu og samstarf í þeim tilgangi að styrkja hagsmuni þeirra og efla konur persónulega og á hverjum þeim vettvangi sem þær kjósa, eða hafa kosið að hasla sér völl.

 

Tengslanetið mun beita sér fyrir því að hvetja konur til áræðni, frumkvöðlastarfs og samfélags- og stjórnmálaþátttöku á opinberum vettvangi og hefur að markmiði að auka sýnileika og tækifæri kvenna, hvort sem er á persónulegum eða opinberum vettvangi og einnig að stuðla að virðingu og verðskuldaðri athygli samfélagsins á framlagi kvenna.

 

Markmiðið er að ná til kvenna um alla Vestfirði og verða reglulegir fundir haldnir yfir vetrarmánuðina, auk þess sem staðið verður fyrir sameiginlegum viðburðum og námskeiðum allt í þeim tilgangi að styrkja og efla hagsmuni kvenna á Vestfjörðum.

Stofnfundurinn verður haldin í Rögnvaldarsal í Edinborgarhúsinu og hefst kl 18.00 Þar verður greint nánar frá tilurð félagsins, konur frá Austurlandi koma og kynna fyrir okkur Tengslanet austfiskra kvenna og konur úr atvinnulífinu hér vestra munu kynna sína starfsemi.

Tengslanetið er ætlað öllum konum sem hafa áhuga á að styrkja hagsmuni sína og efla sig persónulega en nánari upplýsingar er hægt að fá hjá Ásgerði Þorleifsdóttur í síma 450 3053.

Tengslanetið er stofnað af frumkvæði vestfiskra kvenna og er styrkt af Vaxtarsamningi Vestfjarða.

Skrifaðu athugasemd:



Til baka
Vesturbyggð - Kt. 510694-2369 - Aðalstræti 63 - 450 Patreksfirði - Sími: 450 2300 - Fax: 456 1142 - Netfang: vesturbyggd@vesturbyggd.is