Einstefnu á Aðalstræti aflétt

Tilkynning frá lögerglunni á Vestfjörðum/Patreksfirði.

Tímabundin einstefna sem hefur verið á Aðalstrætinu frá húsi nr. 62 og niður að gatnamótum Aðalstrætis/Urðargötu/Bjarkagötu er ekki í gildi lengur. Umrædd einstefna var sett á á meðan framkvæmdir hafa staðið yfir við grunnskólann á Patreksfirði. Þar sem framkvæmdir liggja niðri nú sem stendur var einstefnan tekin af, en verður sett á aftur þegar framkvæmdir hefjast að nýju og verður það þá auglýst frekar.

Laust starf í heimaþjónustu.

Ert þú frábær?  Vantar þig gefandi hlutastarf á dagvinnutíma?  Vesturbyggð leitar eftir frábærum starfsmanni til heimaþjónustu sem er tilbúinn til þess að takast á við krefjandi og skemmtilegt starf.  Um tímavinnu er að ræða. Laun skv. gildandi kjarasamningum. Umsóknarfrestur er til föstudagsins 2. nóvember.  Allar nánari upplýsingar veitir Bríet Arnardóttir ba@vesturbyggd.is frá og með 23. október til 26. október en Elsa Reimardóttir elsa@vesturbyggd.is frá og með mánudeginum 29. október.  Símanúmer Vesturbyggðar er 450 2300.

Uppeldi sem virkar - færni til framtíðar

Foreldranámskeið í febrúar 2008

Félagsþjónustan í Vesturbyggð hefur áhuga á því að bjóða foreldrum upp á námskeið í uppeldi barna í febrúar 2008, ef næg þátttaka fæst.
Á námskeiðinu verða kenndar leiðir til þess að:
  • Koma í veg fyrir hegðunarerfiðleika
  • Hjálpa börnum til að þróa með sér öryggi, sjálfstæði og jákvæðni
  • Auka eigin styrkleika og færni í foreldrahlutverkinu
  • Nota aga á jákvæðan og árangursríkan hátt
  • Kenna börnum æskilega hegðun
  • Takast á við venjuleg vandamál i uppeldi

Námskeiðið hentar foreldrum barna allt til 6 ára aldurs, en foreldrar eru helst hvattir til þess að nýta sér það á meðan barnið er á bilinu 3-24 mánuða. Báðir foreldrar eru hvattir til þess að mæta til þess að námskeiðið skili sem bestum árangri.


Leiðbeinandi er Lone Jensen en hún hefur haldið mörg slík námskeið m.a. hjá Miðstöð heilsuverndar barna.

Áhugasamir eru beðnir um að skrá sig hjá elsa@vesturbyggd.is eða í síma 450 2300. Kennt verður föstudag 17.00-19.00, laugardag 10.00-12.00 - 13.00-15.00 og 9.30-11.30 sunnudag, alls 8 klukkustundir. Gjald fyrir einstakling er kr.  4.000 en kr. 6.000 fyrir pör.

Meira um skipulag og innihald námskeiðs hér

Skólamáltíðir og Kalkþörungar á Bíldudal.

Umjónarmaður Vesturbyggðarsíðunnar var á ferð um Bíldudal í dag.  Kom við í félagsheimilinu Baldurshaga þar sem börn á grunnskólaaldri bið spennt eftir hádegisverði dagsins.  Í matinn  var pizza og fengu börnin svo girnilegt ávaxtasalat í eftirrétt.  Þegar umsjónarmaður ræddi við börnin um matinn og tilhögun hans voru þau öll sem eitt sammála því að maturinn sem þau væru búin að fá væri mjög góður og þau hlakkaði til framhaldsins.  Gaman var að sjá hversu stillt og prúð börnin voru meðan beðið var eftir matnum og tóku svo mjög vel á móti matráðnum sem kom með hvern bakkann á fætur öðrun  hlaðinn pizzum.  Að sögn foreldra eru bæði grunn- og leikskólabörnin mjög ánægð með þessa nýbreytni að fá heitan mat í hádeginu og bíða leikskóla börnin spennt út í glugga í hverju hádegi eftir mátráðunum.  Að sögn matráðanna á Vegamótum þeirra Helgu og Hannesar er gaman að elda ofan í börnin og skólamötuneytið skemmtileg viðbót við reksturinn.

Ekki er hægt að koma við á Bíldudal án þess að keyra niður á höfn.  Þar lá dæluskipið Perla við höfnina og dældi kalkþörungum í lónið við Kalkþörungaverksmiðjuna.  Látum myndirnar tala sínu máli.

Atburðadagatal á heimasíðu Vesturbyggðar.

Vert er að minnast á atburðadagatal sem í boði er á heimasíðu Vesturbyggðar.   Á dagatalið eiga að koma helstu atburðir í Vesturbyggð og dagsetningar þeirra.  Félagasamtök, fyrirtæki og stofnanir geta komið upplýsingum til umsjónarmanns heimasíðu Vesturbyggðar á netföngin ba@vesturbyggd.is og vesturbyggd@vesturbyggd.is.  

Ef upplýsingar eru sendar til umsjónarmanns með góðum fyrirvara ætti atburðadagatalið að nýtast vel og geta orðið til þess að ekki eru margir atburðir í gangi á sama tíma.  Umsjónarmaður hvetur til þess að atburðadagatalið verði mikið notað og ætti það þá að koma íbúum að góðum notum.  Viðburðir sem eiga erindi inn á atburðadagatalið eru t.d. fundir félagasamtaka, skemmtikvöld, fyrirlestrar, afmæli félagssamtaka, fyrirtækja og stofnana, menningarviðburðir og svo mætti lengi telja.
Fréttasafn
Vesturbyggð - Kt. 510694-2369 - Aðalstræti 63 - 450 Patreksfirði - Sími: 450 2300 - Fax: 456 1142 - Netfang: vesturbyggd@vesturbyggd.is