Atvinnu og menningarráð #1

Lagt fram drög að erindisbréfi atvinnu- og menningarráðs.
Atvinnu- og menningarráð gerir ekki athugasemdir við erindisbréfið.

Lagt fram minnisblað dags. 22. maí 2014 frá Atvinnuþróunarfélagi Vestfjarða varðandi hugsanlegar strandsiglingar millilandaskipa til sunnanverða Vestfjarða.
Atvinnu- og menningarráð beinir því til bæjarstjórnar að hafnar verði athuganir í samráði við Vegagerðina um hvaða aðgerðir þarf að ráðast í svo að strandsiglingar geti hafist sem fyrst. Krafa um strandsiglingar hefur verið sett fram af útflutningsaðilum til að tryggja samkeppnishæfni fyrirtækja í Vesturbyggð.

Lagt fram tölvubréf dags. 7. okt. sl. frá Marino Thorlacius varðandi grenjavinnslu í fyrrum Rauðasandshreppi og fylgiskjöl frá Umhverfisstofnun með upplýsingum um endurgreiðslur til sveitarfélaga vegna refaveiða.
Atvinnu- og menningarráð bendir á að nokkrir landeigendur í fyrrum Rauðasandshreppi hafi mótmælt ráðningu núverandi grenjaskyttu fyrir svæðið og bannað viðkomandi að sinna vinnslunni á landareign þeirra. Atvinnu- og menningarráð telur að ekki sé ástæða til að endurskoða ráðningu núverandi grenjavinnslumanns.

Rætt um nytjaskógrækt á sunnanverðum Vestfjörðum.
Atvinnu- og menningarráð bendir á að skógrækt kann að verða framtíðaratvinnurvegur í sveitarfélaginu ef rétt er að staðið og bendir á Vestur-Botns svæðið í því sambandi. Hins vegar verður að taka tillit til fjölmargra sjónarmiða í þessu máli m.a. landbúnaðar, umhverfismála o.fl.

Rætt um komu skemmtiferðaskipa til Vesturbyggðar.
Atvinnu- og menningarráð bendir á að koma skemmtiferðaskipa til hafna Vesturbyggðar getur orðið lyftistöng fyrir margvíslega þjónustu í sveitarfélaginu og leggur áherslu á að hugað verður að kynningu og markaðssetningu á slíkri ferðaþjónustu.

a. Atvinnu- og menningarráð vill hrósa innanríkisráðherra fyrir fagleg vinnubrögð í þeirri ákvörðun sinni að staðsetja sýslumannsembættið á Vestfjörðum á Patreksfirði. Ávinningurinn er efling samvinnu milli atvinnusvæða á Vestfjörðum og þrýstir ákvörðunin á uppbyggingu heilsárssamgangna milli suður- og norðursvæðisins. Hér er framfararskref stigið til varnar fámennari byggðum og til eftirbreytni fyrir önnur ráðuneyti.
b. Lagt fram bréf dags 9. sept. sl. frá Maríu Óskarsdóttur um frönsk menningartengsl á Patreksfirði og uppbyggingu söguseturs í sveitarfélaginu.
Atvinnu- og menningarráð tekur jákvætt í hugmyndir um sögu- og/eða menningasetur í sveitarfélaginu og vísar málinu til bæjarstjórnar.
c. Fjallskilanefnd. Atvinnu- og menningarráð leggur áherslu á að ný fjallskilanefnd verði skipuð og taki til starfa sem allra fyrst.