Skipulags- og byggingarnefnd #185

Erindi frá Einari Sveini Ólafssyni. Í erindinu er sótt um byggingarlóð undir einbýlishús í fjöru neðan Dalbrautar 39 á Bíldudal.

Hafin er vinna við athugun á mögulegum byggingarlóðum á Bíldudal skv. aðalskipulagi sem mun fara í hefðbundið deiliskipulagi þegar að þeirri athugun lýkur. Umræddur reitur verður tekin til skoðunar í því ferli og þ.a.l. ekki unnt að útdeila reitnum að svo stöddu.

Georg Bergmanm Ingvason sækir hér með um byggingarleyfi fyrir breyttu útliti á húsnæði sínu að Þórsgötu 8. Breytingin felur í sér að sett verði gönguhurð á SA-gafl og iðnaðarhurð á NA-hlið hússins.

Erindinu fylgir grunnmynd, útlit og sneiðing. Teikningar unnar af teiknistofu GINGA dags.11.01.14.

Skipulags- og byggingarnefnd samþykkir erindið og felur byggingarfulltrúa að gefa út byggingarleyfi með fyrirvara um samþykki annarra eigenda hússins.

Erindi frá Guðrúnu Jónsdóttir fyrir hönd Bjargs fasteigna ehf.
Í erindinu sækir Guðrún Jónsdóttir um lóð fyrir eign félagsins að Vatnskrók 7, Patreksfirði.

Skipulags-og byggingarnefnd samþykkir erindið fyrir sitt leyti og vísar því til hafnarstjórnar.

Ólafía Björnsdóttir, Magnús Björnsson, Sindri Björnsson og Hlynur V. Björnsson sækja hér með um lóð undir fjárhús/hlöðu sem þeim tilheyrir í Bíldudal.

Fasteignin sem um ræðir hefur fastanr. 212-4694

Sótt er um lágmarkslóð undir fasteignina.

Skipulags- og byggingarnefnd samþykkir erindið og felur byggingarfulltrúa að útbúa lóðablað í samræmi við deiliskipulag sem er í vinnslu fyrir svæðið.

Erindi frá Hlyni V. Björnssyni. Í erindinu er sótt um stöðuleyfi fyrir gám sem hann hyggst grafa inn í bakka fyrir ofan einbýlishús sitt að Dalbraut 54, Bíldudal.

Skipulags- og byggingarnefnd samþykkir erindið með fyrirvara um lóðarstærð, staðsetningu gáms og samþykki nágranna. Byggingarfulltrúa falið að gefa út stöðuleyfi að þessum skilyrðum uppfylltum.

Erindi frá Pennu ehf. Í erindinu er óskað eftir afstöðu skipulags- og byggingarnefndar til fyrirhugaðrar stækkunar á Hótel Flókalundi.

Til stendur að bæta við 6 herbergjum með aðgengi fyrir hreyfihamlaða. Jafnframt er áætlunin að stækka matsal og anddyri hótelsins ásamt betrumbótum á starfsmannaaðstöðu.

Skipulags- og byggingarnefnd tekur jákvætt í erindið en bendir jafnframt á að ekkert deiliskipulag er í gildi fyrir svæðið.

Erindi frá Kristínu og Sólveigu Ólafsdætrum. Í erindinu óska þær eftir að skipulags- og byggingarnefnd endurskoði bókun sína frá 09.12.13.

Skipulags- og byggingarnefnd og byggingarfulltrúi samþykkja erindið fyrir sitt leyti með fyrirvara um að fullnægjandi hönnunargögn vegna breytinga og endurbóta hússins liggi fyrir áður en byggingarleyfi verði veitt og að frágangur verði samkvæmt ákvæðum deiliskipulags fyrir Selárdal að lokinni grenndarkynningu skv. bókun nefndarinnar frá 14.06.2013

Lagt fram erindi frá Gísla Gunnari Marteinssyni þar sem hann tilkynnir áform sín um að hefja skógrækt á 11 ha svæði í landi Holtsfits.

Skipulags- og byggingarnefnd tekur jákvætt í erindið og vísar því áfram til bæjarstjórnar en tekur fram að fyrir samþykkt áformanna þurfi að liggja fyrir umsagnir hlutaðeigandi stofnanna, m.a. frá Minjastofnun.

Skipulags- og byggingarnefnd leggur til að farið verði í átak til eyðingar túnfífli og fíflalús. Borið hefur mjög þessu s.l. tvö sumur á Patreksfirði og virðist vera orðið alvarlegt vandamál.

Skipulags- og byggingarnefnd felur tæknideild að undurbúa áætlun um eyðingu fífla og fíflalúsar og kynna fyrir nefndinni á næsta fundi nefndarinnar.

Lagt fram bréf dags. 15.01.2014 frá Félagi íslenskra landslagsarkitekta, FÍLA þar sem bent er á að starfsheitið landslagsarkitekt er lögverndað.

Lagt fram til kynningar

Lagt fram erindi frá Skipulagsstofnun um boð um þátttöku í samráðsvettvangi vegna mótunar landsskipulagsstefnu 2015-2026.

Skipulags- og byggingarnefnd vísar erindinu til bæjarstjórnar.

Listi yfir skráða skipulagsfulltrúa, desember 2013.

Lagt fram til kynningar

Bæklingur Skipulagsstofnunar, Skipulag byggðar og mótun umhverfis.

Í þessum nýja bæklingi er að finna almennar upplýsingar um skipulagsgerð sveitarfélaga og mat á umhverfisáhrifum framkvæmda og skýrt hvenær og hvernig almenningur getur komið að málunum. Mikilvægt er að almenningur þekki skipulagskerfið og rétt sinn til þáttöku, þessi málefni varða okkur öll.

Lagt fram til kynnningar.