Breytt samstarf Norlandair og Air Iceland Connect
Unnið hefur verið að samþættingu starfsemi Air Iceland Connect og Icelandair í nokkurn tíma. Frá og með þriðjudeginum 16. mars næstkomandi munu leiðakerfi Air Iceland Connect og Icelandair verða að einu enn öflugra leiðakerfi og sölu- og markaðsstarf sameinast undir vörumerki Icelandair.
Skrifað: 9. mars 2021
Vörur og þjónusta Icelandair, innanlands sem utan, verða þannig samræmdar og aðgengilegar á einum stað á www.icelandair.is
Áfangastaðir Icelandair í innanlandsflugi verða eftir sem áður Akureyri, Egilsstaðir, Ísafjörður og Vestmannaeyjar. Þá hafa Air Iceland Connect og Norlandair átt í samstarfi um flug til nokkurra áfangastaða á Íslandi til viðbótar, svo sem til Bíldudals og Gjögurs frá Reykjavík, ásamt flugi til Grímseyjar, Vopnafjarðar og Þórshafnar frá Akureyri. Hægt hefur verið að kaupa flugmiða á þessa áfangastaði í einum miða í gegnum bókunarsíðu Air Iceland Connect.
Eftir samþættingu Air Iceland Connect og Icelandair breytist samstarf Norlandair við félagið þannig að flug á áfangastaði Norlandair verða einungis fáanleg á heimasíðu þeirra (https://www.norlandair.is/) en ekki í gegnum bókunarsíðu Icelandair. Félögin munu þó áfram vinna þétt saman og engin breyting verður á þjónustu við farþega frá Akureyrarflugvelli né Reykjavíkurflugvelli. Þá vinna félögin að því í samstarfi við Vegagerðina að tryggja að þessi breyting hafi ekki áhrif á Loftbrúar-réttindi þeirra sem nýta sér þá þjónustu.