Hoppa yfir valmynd

Arnarlax gefur björg­un­ar­vesti fyrir börn

Bíldu­dals­höfn og Patreks­höfn fengu í gær afhent 25 björg­un­ar­vesti að gjöf. Vestin eru sérhönnuð fyrir börn og tilgang­urinn er að auka öryggi hafn­ar­svæð­anna í sveita­fé­lög­unum. Hafnir eru algeng leik­svæði barna í sjáv­ar­byggðum en geta um leið reynst þeim mjög hættu­legar.


Skrifað: 1. júní 2022

Fréttir

Nýju barnavestin uppfylla ströngustu staðla og vottanir um öryggi en þau verða geymd á áberandi stað í merktum körum á hafnarsvæðum sveitarfélaganna.

Það er fiskeldisfyrirtækið Arnarlax sem gaf vestin en fyrirtækið er umsvifamikið á Vestfjörðum og er með hafnsækna starfsemi á þremur ólíkum stöðum í landshlutanum.

„Með þessari gjöf viljum við stuðla að öryggi barna á hafnarsvæðunum en mikið er um að ungir veiðimenn leggi leið sína á bryggjurnar, ekki síst á sumrin og á fallegum vordögum eins og undanfarið. Á sama tíma er þar oft mikil umferð, það getur verið hált og ekki víst að fólk verði þess alltaf var ef einhver fellur í höfnina,“ segir Silja Baldvinsdóttir gæðastjóri Arnarlax.