Birta Ósmann Þórhallsdóttir er bæjarlistamaður 2024
Á hátíðarhöldum á Bíldudal á 17. júní voru verðlaun veitt fyrsta bæjarlistamanni í sameinuðu sveitarfélagi. Skáldið, myndlistarkonan, útgefandinn og þýðandinn Birta Ósmann Þórhallsdóttir hlaut verðlaunin að þessu sinni. Verðlaunin eru viðurkenning á góðum störfum í þágu listar og menningar, þeim er ætlað að vekja athygli á verkum listamannsins og jafnframt verka sem hvatning til að koma starfi sínu á framfæri.
Birta er uppalin í Reykjavík. Hún nam myndlist við Listaháskóla Íslands og fór þaðan til Mexíkó í teikninám þar sem hún lærði spænsku sem hefur nýst henni í þýðingarstörfum. Úr myndlistinni lá leiðin í meistaranám í ritlist við Háskóla Íslands, þar sem hún fékk mikla hvatningu og tók líka áfanga í spænskudeild og þýðingarfræði. Birta blandar mikið saman ritlist og myndlist.
Eftir að hafa hrærst í ysnum og þysnum í Reykjavík og Mexíkóborg breytti Birta til og flutti á ættarslóðir á Hvammstanga, enda hefur hún alltaf sótt mikinn innblástur í náttúruna og róna, sem skín í gegn í verkum hennar.
Meðfram því að starfa í ýmsum safnaverkefnum í Húnaþingi stofnaði Birta bókaútgáfuna Skriðu – eða í raun var það Skriða, kötturinn hennar Birtu, sem stofnaði Skriðu bókaútgáfu. Með fyrstu útgáfum má nefna Einsamræður, örsagnasafn eftir Birtu sjálfa, Vínbláar varir, ljóðabók eftir Sigurbjörgu Friðriksdóttur og þýðingu Freyju Eilífar á Mannverunni eftir Maxím Gorkí. Birta kemur að ritstjórn allra bókanna en leggur mikla áherslu á að höfundurinn hafi lokaákvörðunarvald og að honum líði vel með lokaútkomuna. Skriða hefur gefið út að meðaltali þrjár bækur á ári frá stofnun.
Birta elti ástina á Patreksfjörð fyrir um þremur árum og tók bókaútgáfuna Skriðu og köttinn Skriðu með sér. Þar opnaði hún vinnustofu á Eyrargötu og festi kaup á prentvélum úr prentsmiðju til að geta prentað bækurnar hjá sér. Leiðarljós í starfi Skriðu er að allt ferli bókaútgáfunnar sé unnið á staðnum, það er handverkið, prentunin, útgáfuhófið og fleira. Núna í sumar mun hún byrja að prenta fyrstu bækurnar frá A til Ö.
Birta hefur staðið fyrir viðburðum og smiðjum í Skriðu, til dæmis upplestrarkvöldi með Ólafi Sveini Jóhannessyni og Sigríði Soffíu Níelsdóttur sem eru bæði tengd vestur, fjölskyldusmiðju um sjómannadagshelgina og sýningu á heimildarmynd um Skjaldborgarhelgina.
Þá hefur Birta leyst forstöðumann bókasafnsins af síðastliðinn vetur en fer aftur í fullt starf sem listamaður og útgefandi núna í sumar. Birta er öflugur þýðandi, meðal annars hefur hún þýtt Drottningarnar í garðinum eftir Camilu Sozu Villada sem Benedikt bókaútgáfa gefur út um þessar mundir, og hefur auk þess þýtt mikið af skýrslum, námsefni og öðrum bókum úr spænsku.
Kaupa má bækur Skriðu á heimasíðu útgáfunnar og koma við á verkstæði Birtu í Eyrargötu.
Valnefndin taldi Birtu sýna mikla djörfung og dug að vera með sjálfstæða bókaútgáfu og að starfa í fullu starfi sem listamaður og útgefandi í sveitarfélaginu okkar. Þá taldi hún jákvætt að störf Birtu vektu athygli í menningarsamfélaginu utan sveitarfélagsins og ekki síður að hún væri að skapa vettvang fyrir íbúa til að taka þátt í sköpun og viðburðum. Nefndin vonar að verðlaunin verði Birtu hvatning til áframhaldandi góðra verka, hún sé samfélaginu okkar til sóma.
Óskað var eftir tilnefningum á heimasíðum Tálknafjarðarhrepps og Vesturbyggðar, síðan sameinaðs sveitarfélags. Alls bárust tíu tilnefningar. Menningar- og ferðamálafulltrúi skipaði fulltrúa í valnefnd sem fóru yfir innsendar tillögur og völdu úr þeim. Valnefndina skipuðu Gestur Rafnsson, Gunnþórunn Bender, Kristín Mjöll Jakobsdóttir, Ólafur Helgi Kolbeinsson og Skúli Gautason. Kærar þakkir til þeirra sem sendu inn tillögur og gerðu verk nefndarinnar síður en svo auðvelt.