Fjárhagsáætlun Vesturbyggðar 2021-2024
Bæjarstjórn Vesturbyggðar staðfesti á fundi sínum í gær, 9. desember, fjárhagsáætlun Vesturbyggðar fyrir árið 2021 og áætlanir til næstu þriggja ára.
Fjárhagsáætlunin tekur mið af þeirri fordæmalausu stöðu sem uppi er vegna áhrifa kórónuveirufaraldursins. Veruleg tekjuskerðing er áætluð á árinu 2021, m.a. vegna skertra framlaga úr Jöfnunarsjóði sveitarfélaga og lægri rekstrartekna, sem rekja má beint til áhrifa kórónuveirufaraldursins. Framlög Jöfnunarsjóðs hafa frá árinu 2018 lækkað úr 418 millj. kr. í 317 millj. kr. á árinu 2021. Hefur þessi mikla skerðing gríðarleg áhrif fyrir rekstur sveitarfélagsins. Ráðist var í verulegan niðurskurð á árinu 2020 og mitt í þeirri vegferð, fór sveitarfélagið Vesturbyggð inn í þá flóknu og erfiðu tíma sem kórónuveirufaraldurinn hefur haft í för með sér fyrir rekstur sveitarfélagsins, líkt og annarra sveitarfélaga hringinn í kringum landið.
Skrifað: 10. desember 2020
Í fjárhagsáætlun ársins 2021 er lögð rík áhersla á að standa vörð um lögbundna þjónustu sveitarfélagsins, með áherslu á fræðslu-, uppeldis- og æskulýðsmál og hún verði ekki skert á árinu þrátt fyrir lægri tekjur.
Í áætluninni 2021 er ekki gert ráð fyrir að draga úr nauðsynlegri fjárfestingu. Ástæða þeirrar ákvörðunar bæjarstjórnar Vesturbyggðar er í fyrsta lagi til að tryggja áframhaldandi framþróun sveitarfélagsins sem er nú í örum vexti og í öðru lagi til að veita nauðsynlega viðspyrnu fyrir samfélagið í heild sinni til að takast á við tímabundin áhrif kórónuveirufaraldursins. Að mati bæjarstjórnar Vesturbyggðar mun áhersla á aukna fjárfestingu á árinu 2021 auka enn frekar getu sveitarfélagsins til framtíðar og styrkja stöðu Vesturbyggðar til að takast á við enn frekari vöxt, atvinnuuppbyggingu og fjölgun íbúa.
Í samstæðu Vesturbyggðar í heild sinni er gert ráð fyrir að heildartekjur verði 1,6 milljarður króna en heildarútgjöld 1,4 milljarður króna fyrir afskriftir og fjármagnsliði. Afskriftir eru áætlaðar 81 milljón og fjármagnsliðir 110 milljónir. Rekstrarniðurstaða bæjarsjóðs og stofnana er því áætluð að verða neikvæð uppá 29,5 milljónir á árinu 2021.
Almenn hækkun á gjaldskrám Vesturbyggðar 2012 eru 2,5% og tekur mið af yfirlýsingu Sambands íslenskra sveitarfélaga í tengslum við lífskjarasamninga 2019-2022.
Í áætlun fyrir árin 2022- 2024 er að finna yfirlit um helstu fjárfestingar til næstu ára, sem markar stefnu sveitarfélagsins til þeirrar öflugu framtíðaruppbyggingar sem fyrirhuguð er í Vesturbyggð. Þá er gert ráð fyrir að markvisst verði áfram dregið úr rekstrarkostnaði, sem mun nema um 2% á árinu 2022, en unnið verður að þeirri hagræðingu á árinu 2021. Þriggja ára áætlunin byggir annars á magnbreytingum, fjölgun íbúa og að framlög Jöfnunarsjóðs muni jafna sig á tímabilinu sem og að aðrar tekjur muni aukast á ný. Fjárhagsáætlunin gerir því ráð fyrir betri tíð með blóm í haga líkt og skáldið orti eitt sinn.