Fyrstu fundir heimastjórna og nýr ritari þeirra
Heimastjórnir Arnarfjarðar, Tálknafjarðar, Patreksfjarðar og fyrrum Barðastrandarhrepps og Rauðasandshrepps hafa nú lokið sínum fyrstu fundum.
Af málum sem hafa verið tekin fyrir eru meðal annars viðhaldsþörf í Tálknafirði og á Tálknafjarðarhöfn, umsókn um leyfi fyrir auglýsingaskiltum á Patreksfirði, framtíðarmöguleikar fyrir tjaldsvæði á Bíldudal og höfnun umsóknar Vesturbyggðar í framkvæmdasjóð ferðamannastaða fyrir verkefninu Bygging aðstöðuhúss við Laugarneslaug. Auk þess hafa ýmis mál sem snerta þeirra heimasvæði verið kynnt fyrir heimastjórnunum. Fundargerðir má finna í hlekkjunum hér að neðan.
Lilja Magnúsdóttir hefur verið ráðinn ritari heimastjórna og hóf hún störf í júní. Hún heldur utan um störf heimastjórna, ritar fundargerðir og fylgir málum þeirra eftir. Lilja er skógfræðingur að mennt, hefur haldgóða reynslu af sveitarstjórnarmálum, meðal annars sem oddviti sveitarstjórnar Tálknafjarðarhrepps, og hefur starfað í ýmsum ráðum og nefndum. Við bjóðum hana hjartanlega velkomna til starfa.
![Fyrsti fundur heimastjórnar Patreksfjarðar Frá vinstri: Lilja Magnúsdóttir starfsmaður heimastjórna, Páll Hauksson varamaður sem kom inn fyrir Gunnar Sean Eggertsson, Rebekka Hilmarsdóttir formaður og Tryggvi B. Baldursson fulltrúi bæjarstjórnar.](https://vesturbyggd-wp.kolofon.dev/wp-content/uploads/2024/07/heimastjorn-patro-1200x1600.jpg)
Frá vinstri: Lilja Magnúsdóttir starfsmaður heimastjórna, Páll Hauksson varamaður sem kom inn fyrir Gunnar Sean Eggertsson, Rebekka Hilmarsdóttir formaður og Tryggvi B. Baldursson fulltrúi bæjarstjórnar.
Hvað eru heimastjórnir?
Samhliða kosningum til sveitarstjórnar nýs sameinaðs sveitarfélags þann 4. maí síðastliðinn voru fulltrúar kosnir í heimastjórnir. Heimastjórnir eru fastanefndir innan sameinaðs sveitarfélags sem starfa í umboði sveitarstjórnar. Markmiðið með heimastjórnum er að heimamenn hafi aðkomu að ákvörðunum sem varða nærumhverfi sitt og geta ályktað um málefni sem snýr að viðkomandi byggðarlagi og komið málum á dagskrá bæjarstjórnar. Í hverri heimastjórn eru þrír fulltrúar, tveir sem kosnir eru sérstaklega samhliða sveitarstjórnarkosningum og einn bæjarfulltrúi. Heimastjórnirnar eru fjórar, það eru heimastjórn Arnarfjarðar, heimastjórn Tálknafjarðar, heimastjórn Patreksfjarðar og heimastjórn fyrrum Barðastrandarhrepps og Rauðasandshrepps.