Rebekka Hilmarsdóttir ráðin bæjarstjóri
Bæjarráð Vesturbyggðar samþykkti á fundi sínum í dag að ráða Rebekku Hilmarsdóttur í starf bæjarstjóra Vesturbyggðar. Rebekka var valin úr hópi níu umsækjenda.
Skrifað: 24. júlí 2018
Rebekka er 34 ára gömul og er lögfræðingur að mennt, hún starfar sem lögfræðingur og staðgengill skrifstofustjóra hjá atvinnuvega- og nýsköpunarráðuneytinu. Einnig hefur hún starfað sem lögfræðingur hjá Umboðsmanni skuldara ásamt því að starfa við þýðingar hjá utanríkisráðuneytinu.
Rebekka er fædd og uppalin í Kollsvík í Vesturbyggð. Árið 2015 keypti hún, ásamt eiginmanni sínum, Gamla spítalann á Patreksfirði sem byggður er árið 1901 og hafa þau unnið hörðum höndum við að gera hann upp síðan.
Rebekka hyggst flytja á Patreksfjörð ásamt eiginmanni sínum Erni Hermanni Jónssyni og syni þeirra. Gert er ráð fyrir að Rebekka taki við embætti bæjarstjóra Vesturbyggðar þann 1.október.