Tilnefningar til bæjarlistamanns 2023
Árlega útnefnir Vesturbyggð bæjarlistamann til eins árs í senn. Auglýst er eftir tilnefningum til bæjarlistamanns Vesturbyggðar 2023.
Öll geta sent inn tilnefningar. Tilnefna má listamenn úr öllum listgreinum, hvort sem það er úr hannyrðum, myndlist, ritlist, leiklist, tónlist eða öðru.
Verðlaunin verða afhent þann 17. júní næstkomandi. Þau voru fyrst veitt Rannveigu Haraldsdóttur árið 2021 og Signý Sverrisdóttir hlaut nafnbótina árið 2022. Verðlaunin eru viðurkenning á góðum störfum í þágu listarinnar, þeim er ætlað að vekja athygli á verkum listamannsins og jafnframt verka sem hvatning til að koma starfi sínu á framfæri.
Tilnefningar og ábendingar berist í tölvupósti til menningar- og ferðafulltrúa í síðasta lagi miðvikudaginn 31. maí 2023. Tilnefningum má gjarnan fylgja rökstuðningur og upplýsingar um störf listamannsins en ekki er gerð krafa um slíkt.