Verum frábær í febrúar! - seinni hálfleikur
Sumir segja að ólíkt dýrunum hefur maðurinn aldrei áttað sig á því að eini tilgangur lífsins er að njóta þess. Það er hins vegar mín trú að meðvitað færist það í aukana dag frá degi hjá okkur mannfólkinu að „vera slakur að njóta og lifa“. Aðrir segja að lifi maður óhamingjuríku lífi er erfitt að lifa en lifi maður hamingjuríku lífi er erfitt að deyja og því komi það út á eitt. Það er hins vegar trú undirritaðs að við finnum öll til í lífinu og að við mikilvægustu krossgötur þess eru sjaldan skilti sem vísa þér veginn, heldur iðulega ótroðnar slóðir. Eitt er hins vegar ljóst að sértu í góðu andlegu og líkamlegu jafnvægi tekur þú yfirvegaðar ákvarðanir. Þess vegna ætlum við að vera frábær í febrúar – sem og aðra mánuði reyndar 🙂
Skrifað: 15. febrúar 2021
Verum frábær í febrúar er hvatningarátak sveitarfélaganna og HHF til ykkar íbúa til áminningar um að hlúa að eigin hreysti og heilbrigði, sérstaklega núna þegar myrkrið virðist alls ráðandi. Dreifibréf var sent í hús með það að markmiði að gera þriðju-, fimmtu- og laugardaga að hreystidögum í febrúar. Einnig voru settar fram hugmyndir af því hvað hægt er gera nú fyrri hluta febrúar og nú mun ykkur berast annað dreifibréf fyrir seinni hluta mánaðarins. Núna í febrúar er líka landsátakið „Lífshlaupið“ í gangi og hvetjum við alla til þátttöku í því.
Því miður er það of algengt að fólk glími við lyndisraskanir á þessum tímum. Hlúum að okkur sjálfum, tökum eftir eigin líðan og leitumst við að gera það sem í okkar valdi stendur til að hafa líðan okkar ávallt sem besta. Hvort sem það er með hreyfingu, næringarríkum mat, hugleiðslu eða jafnvel faglegri aðstoð.