Bæjarráð #906

Sigríður Kristjánsdóttir, framkvæmdastjóri mætti inn á fundinn í fjarfundi og fór yfir helstu verkefni Vestfjarðastofu.

Sviðsstjóri umhverfis- og framkvæmdasviðs kom inn á fundinn og fór yfir mögulegar lausnir fyrir Áhaldahúsið á Bíldudal.

Sviðsstjóri umhverfis- og framkvæmdasviðs kom inn á fundinn og fór yfir stöðu gatna og umferðaröryggis á Bíludual.

Sviðsstjóri stjórnsýslu- og fjármálasviðs fór yfir stöðu útsvars fyrstu níu mánuði ársins. Eftirálagða útsvarið sem skilaði sér í september var hærra en áætlun gerði ráð fyrir og hefur því þróun útsvarstekna færst í átt að upprunalegri áætlun. Miðað við stöðuna í lok september eru útsvarstekjur 2 milljónum króna undir áætlun 2020. Hag- og upplýsingasvið Sambands Íslenskra sveitarfélaga hefur gefið út staðgreiðsluáætlun fyrir árið 2020 og gerir hún ráð fyrir að útsvar ársins 2020 verði 4,5 milljónum króna undir áætlun.

Gert er ráð fyrir að staðgreiðslutekjur hækki um 3,2% á árinu 2021.

Áætlun jöfnunarsjóðs fyrir framlög 2020 sem birt var 1. október 2020 gerir ráð fyrir enn meiri lækkun framlaga til Vesturbyggðar en gert var ráð fyrir í júní. Samkvæmt áætluninni er gert er ráð fyrir 22% lækkun útgjaldajöfnunarframlags eða um 38,1 milljóna króna skerðingu, 15% lækkun á grunnskólaframlagi eða 17,7 milljóna króna skerðingu og 17% lækkun á fasteignaframlagi eða 14 milljóna króna skerðingu. Gerir það samtals lækkun uppá 70 milljónir króna af framlagi jöfnunarsjóðs á árinu 2020 frá upprunalegum áætlunum.

Bæjarráð ítrekar aftur bókun sína frá 896. og 903. fundi sínum þar sem bent er á mikilvægi framlaga Jöfnunarsjóðs til sveitarfélaga og mikilvægi þess að þau séu ekki skert. Sveitarfélagið reiðir sig á framlög Jöfnunarsjóðs til að geta staðið undir lögbundnum verkefnum.

Lögð voru fram fyrstu drög að yfirliti yfir fjárfestingar og sérgreind verkefni vegna vinnu við fjárhagsáætlun 2021-2024. Þá var rætt um fyrirkomulag vinnufunda aukins bæjarráðs við gerð fjárhagsáætlunar.

Lagt fram erindi frá Agli St. Fjeldsted, dags. 27. september 2020, þar sem óskað er eftir styrk
til útgáfu bókar um Krapaflóðin sem féllu á Patreksfirði 22. janúar 1983.

Bæjarráð fagnar framtakinu og vísar erindinu til menninga- og ferðamálaráðs til afgreiðslu.

Lagt fram minnisblað slökkviliðsstjóra dags. 25. september 2020 vegna siglingavernda og stjórnendavaktar. Í minnisblaðinu er lagt til að sameina stjórnendavakt slökkviliðsins og vaktsíma siglingaverndar sem tekið yrði tillit til við gerð fjárhagsáætlunar fyrir árið 2021.

Bæjarráð vísar minnisblaðinu til umfjöllunar í hafna- og atvinnumálaráði en bendir á að nú sé í gangi vinna við að greina fýsileika að sameiningu slökkviliðs og sjúkraflutninga á sunnanverðum Vestfjörðum, sem taka þurfi einnig tillit til við afgreiðslu málsins af hálfu hafna- og atvinnumálaráðs.

Lögð fram drög að áfangastaðaáætlun Vestfjarða frá Vestfjarðastofu dags. 6. október 2020. Drögunum er vísað til umfjöllunar í menningar- og ferðamálaráði og bæjarstjóra falið að senda Vestfjarðastofu athugasemdir við drögin í samræmi við umræður á fundinum og að lokinni umfjöllun menningar- og ferðamálaráðs.

Lagt fram bréf Vegagerðarinnar, dags. 28. september 2020 vegna skipunar starfshóps sem hefur það markmið að móta samstarf helstu aðila sem hagsmuna hafa að gæta varðandi umbætur og hagræðingu vegna girðinga og vinna tillögur hvernig slíkt samstarf verði best unnið á svæðisvísu. Í bréfinu er óskað eftir upplýsingum frá Vesturbyggð um kostnað vegna girðinga.

Bæjarstjóra falið að svara bréfinu.

Bæjarstjóri fór yfir þau verkefni sem sveitarfélagið kom að, vegna umsókna í Framkvæmdasjóð ferðamannastaða 2021. Umsóknirnar snúa að byggingu aðstöðuhúss við sundlaugina Krossholtum í samvinnu við Ungmennafélag Barðstrendinga, upplýsingaskilti á Rauðasandi í samvinnu við landeigendur, uppbyggingu gamalla húsa á Bíldudal í samstarfi við áhugamannafélagið Gyðu og uppbyggingu sjótengds útivistarsvæðis við Vatneyri á Patreksfirði.

Lögð fram til kynningar fundargerð 888. fundar stjórnar Sambands íslenskra sveitarfélaga vegna fundar 29. september 2020.

Lagt fram til kynningar bréf Veðurstofu Íslands dags. 1. október 2020 þar sem endurskoðað verður hættumat undir nokkrum varnargörðum hér á landi, þar á meðal á Bíldudal (Búðargil). Bréfinu fylgir yfirlitskort sem sýnir það svæði sem endurskoðun hættumats mun ná til og ítrekar Veðurstofan að ekki verði byggt á því svæði.

Lagt fram til kynningar tölvupóstur frá Naomi Bos f.h. stjórnar Félags skógarbænda á Vestfjörðum dags. 4. október 2020 vegna aðalfundar Félags skógarbænda á Vestfjörðum.

Lagður fram til kynningar tölvupóstur Matvælastofnunar dags. 14. september 2020 þar sem vakin er athygli á að umdæmi héraðsdýralækna verða fimm.