Hafna- og atvinnumálaráð #17

Valdimar B. Ottósson vék af fundi.

Erindi frá Arnarlax, dags. 25. febrúar 2020. Í erindinu er óskað eftir viðræðum um langtímasamning vegna þjónustu og notkunar hafna Vesturbyggðar.

Hafna- og atvinnumálaráð frestar afgreiðslu málsins og felur hafnarstjóra að óska eftir kynningu frá forsvarsmönnum fyrirtækisins um langtímaáform þess fyrir hafna- og atvinnumálaráð og bæjarráð Vesturbyggðar.

Valdimar B. Ottósson kom aftur inn á fundinn.

Erindi frá Landslögum f.h. Arctic Fish ehf, dags. 20. febrúar 2020. Í erindinu er óskað eftir viðræðum um langtímasamning vegna hafnagjalda.

Hafna- og atvinnumálaráð frestar afgreiðslu málsins og felur hafnarstjóra að óska eftir kynningu frá forsvarsmönnum fyrirtækisins um langtímaáform þess fyrir hafna- og atvinnumálaráð og bæjarráð Vesturbyggðar.

Erindi frá Arctic Protein ehf, dags. 11. mars 2019. Í erindinu er sótt um að heimild til að breyta deiliskipulagi við Patrekshöfn. Breytingin felur í sér breytta afmörkun lóða sem skapar svæði undir meltutanka. Umsókninni fylgir breytingartillaga að deiliskipulagi, unnin af Landmótun, dags. 4. mars 2020.

Skipulags- og umhverfisráð samþykkti erindið fyrir sitt leyti á 70. fundi sínum sem haldinn var 12. mars 2020 og vísaði erindinu áfram til hafna- og atvinnumálaráðs.

Hafna- og atvinnumálaráð frestar afgreiðslu málsins.

Erindi frá Arnarlax hf, dags. 14.febrúar 2020. Í erindinu er sótt um að fá að bæta við þriðja tankinum undir meltu við NV-horn meltu- og vatnshreinsistöðvar við Strandgötu 10-12 á Bíldudal. Áður var búið að samþykkja uppsetningu á þremur tönkum, tveimur undir meltu og einum jöfnunartanki fyrir vatnshreinsistöð. Erindinu fylgir uppdráttur unnin af hugsjón, dags. 14.02.2020.

Skipulags- og umhverfisráð samþykkti erindið fyrir sitt leyti með fyrirvara um jákvæða niðurstöðu grenndarkynningu á 70. fundi sínum sem haldinn var 12. mars 2020 og vísaði erindinu áfram til hafna- og atvinnumálaráðs.

Hafna- og atvinnumálaráð samþykkir áformin með fyrirvara um grenndarkynningu. Um óverulega breytingu á deiliskipulagi Bíldudalshafnar er að ræða, en skilgreina þarf stærri byggingarreit innan lóðar Strandgögu 10-12 á Bíldudal og auka við skilgreint nýtingarhlutfall. Skipulagsfulltrúa falið að grenndarkynna breytinguna.

Lögð fram til kynningar skýrsla starfshóps sjávarútvegs- og landbúnaðarráðherra um endurskoðun á meðferð og ráðstöfun 5,3% aflaheimilda, dags. febrúar 2020. Einnig er lögð fram til kynningar umsögn Sambands íslenskra sveitarfélaga, dags. 6. mars 2020 sem unnin var í samráði við Samtök sjávarútvegssveitarfélaga um skýrsluna.

Lögð fram til kynningar fundargerð nr. 419 frá stjórn Hafnarsambands Íslands og fundargerð 20. fundar siglingaráðs.