Hafna- og atvinnumálaráð #26

Hafnarstjóri fór yfir gjaldtöku hafna Vesturbyggðar á árinu 2020.

Erindi frá Odda hf. dags. 23. nóvember 2020. Í erindinu er óskað eftir framlengingu á lóðarúthlutun frá 17. apríl 2019 þar sem samþykkt var að úthluta til Odda hf. byggingarlóð á mótum Eyrargötu og Patrekshafnar til byggingar vinnsluhúsnæðis.

Hafna- og atvinnumálaráð samþykkir framlengingu á lóðarúthlutuninni um 1 ár.

Lagt fram bréf Skipulagsstofnunar dags. 17. nóvember 2020 þar sem óskað er umsagnar Vesturbyggðar um matsskyldufyrirspurn vegna breytinga á eldissvæðum í Patreksfirði og Tálknafirði. Óskað er umsagnar um hvort og á hvaða forsendum ofangreind framkvæmd skuli háð mati á umhverfisáhrifum að teknu tilliti til 2. viðauka laga um mat á umhverfisáhrifum nr. 106/2000.

Inn á fundinn komu Þorsteinn Másson og Jón Garðar Jörundsson frá Arnarlax og Eva Dögg Jóhannesdóttir frá Arctic Fish og kynntu áform um breytingu á eldissvæðum.

Hafna- og atvinnumálaráð felur hafnarstjóra að skila inn umsögn um breytinguna í samræmi við umræðu á fundinum og í samráði við bæjarstjóra.

Rætt um samfélagsábyrgð fyrirtækja á svæðinu, lögheimilisskráningar starfsmanna fyrirtækj o.fl.

Hafna- og atvinnumálaráð hvetur Vegagerðina til að auka vetrarþjónustu á þjóðvegi nr. 63 upp Trostansfjörð og halda veginum opnum til jafns við Dynjandisheiðina.

JG lagði fram fyrirspurn varðandi endurnýjunartíma á stálþilum, hvort ekki sé kominn tími á endurnýjun á eldri stálþilskanti á Bíldudal. Hafnarstjóra falið að taka saman byggingarár hafnarkanta í höfnum Vesturbyggðar og kanna með áætlanir um endurnýjun og kynna á næsta fundi ráðsins.

Þá leggur hafna- og atvinnumálaráð áherslu á að unnið verði framtíðarskipulag fyrir Bíldudalshöfn og vegtengingu að höfninni.

Lagt fram bréf breiðafjarðanefndar dags. 23. nóvember 2020. Í erindinu er óskað umsagnar um skýrsla Breiðafjarðarnefndar um framtíð Breiðafjarðar, samantekt og niðurstöður upplýsingaöflunar og samráðs.

Hafna- og atvinnumálaráð felur hafnarstjóra að skila inn umsögn í takt við umræður á fundinum.

Lagt fram til kynningar bréf frá Fiskistofu dags. 20. nóvember 2020 þar sem tilkynnt er um sérstakt gjald af strandveiðibátum sem greiða á hverri höfn í hlutfalli viðkomandi hafnar í heildarafla sem fenginn var við strandveiðar tímabilið 01.05.20 - 31.08.20. Skipt niður á hafnir, kemur eftirfarandi í hlut hafnasjóðs Vesturbyggðar:

- Brjánslækjarhöfn: 84.084 kr.
- Patrekshöfn: 3.279.293 kr.
- Bíldudalshöfn: 616.964 kr.

Lagt fram til kynningar bréf sjávarútvegs- og landbúnaðarráðherra dags. 30. nóvember 2020 varðandi úthlutun byggðakvóta 2020/2021. Úthlutun aflaheimilda sem koma í hlut vegna byggðarlaga innan Vesturbyggðar fiskveiðiárið 2020/2021 er eftirfarandi:

Bíldudalur: 70 tonn.
Brjánslækur: 15 tonn.
Patreksfjörður: 15 tonn.

Lögð fram til kynningar fundargerð frá 428. fundi stjórnar Hafnarsambands Íslands.