Græn skref - umhverfisvottun Vestfjarða.

Lína Björg Tryggvadóttir verkefnisstjóri hjá Fjórðungssambandi Vestfirðinga kom inn á fundinn og kynnti verkefnið Græn skref. Verkefnið snýst um að efla vistvænan rekstur í starfsemi sveitarfélagsins og minnka umhverfisáhrif sveitarfélagsins í fjórum skrefum.

Skipulags- og umhverfisráð þakkar Línu Björg fyrir góða kynningu og leggur til við bæjarstjórn Vesturbyggðar að þær stofnanir sveitarfélagsins sem ekki eru þáttakendur í álíka verkefnum verði hvattar til að taka þátt í Grænum skrefum í tengslum við verkefnið umhverfisvottaðir Vestfirðir, en grunn- og leikskólar Vesturbyggðar hafa verið þáttakendur í grænfána verkefni Landverndar undanfarin ár sem og hafnir Vesturbyggðar þáttakendur í bláfána verkefni Landverndar. Ennfremur leggur skipulags- og umhverfisráð til við bæjarstjórn að tilnefndur verði ábyrgðaraðili innan sveitarfélagsins til að fylgja verkefninu eftir.

Lögð fram gögn um verkefnið „Græn skref, umhverfisvottun Vestfjarða“ frá Fjórðungssambandi Vestfirðinga, erindi sem vísað var til bæjarráðs á 308. fundi bæjarstjórnar þann 10. apríl sl.
Bæjarráð skipar Davíð Rúnar Gunnarsson sem fulltrúa Vesturbyggðar til að hafa umsjón fyrir þess hönd með verkefninu „Græn skref, umhverfisvottun Vestfjarða“.