Menningar- og ferðamálaráð #14

Magnea Garðarsdóttir, starfsmaður Vestfjarðastofu, kom inn á fundinn í gegnum fjarfundarbúnað.
Magnea kynnti drög að ferðamálastefnu Vesturbyggðar, sem Vestfjarðastofa hefur unnið að s.l. ár, í samstarfi við sveitarfélagið.

Ráðið fagnar áfanganum og felur menningar- og ferðamálafulltrúa að koma athugasemdum til skila og vísar málinu til umfjöllunar bæjarráðs.

Lagðar fyrir styrkbeiðnir sem bárust ráðinu fyrir fyrstu úthlutun ársins 2021. Alls bárust sex umsóknir.

1.Matteo Tarsi óskar eftir styrk að upphæð 100 þús krónum vegna útgáfu afmælisrits prófessors Jóns Axels Harðarsonar Patreksfirðings. Matteo er ritstjóri verksins.

Verkefnið hófst árið 2018 og verður útkoma þess 450 bls. bók þar sem 20 málvísindamenn frá öllum heimshornum, þar á meðal Íslandi, skrifa grein Jóni Axeli til heiðurs, en hann verður 65 ára í október 2021.

Menningar- og ferðamálaráð hafnar styrkbeiðninni og óskar umsækjanda góðs gengis.

2. Hringleikur - sirkuslistafélag óskar eftir styrk að upphæð 250 þúsund krónum vegna sirkussýningarinnar Allra veðra von.

Hringleikur mun ferðast um Vestfirði sumarið 2021, með verkið Allra veðra von, og sótt er um styrk til að halda sýningu á Patreksfirði. Sýningin er sýnd utandyra þar sem sirkuslistir, leikræn tjáning, náttúra og umhverfi spila saman og mynda einstaka upplifun áhorfenda. Sýningin er aðgengileg breiðum áhorfendahópi, hvort sem um ræðir aldurshóp, þjóðerni eða búsetu.

Menningar-og ferðamálaráð samþykkir að veita verkefninu styrk að upphæð 100 þúsund krónum, í samræmi við úthlutunarreglur ráðsins.

3. Vefritið Úr Vör sækir um styrk að upphæð 100 þúsund krónum vegna pistlaskrifa frá sunnanverðum Vestfjörðum.

Verkefnið snýst um að lausapennar frá sunnanverðum Vestfjörðum skrifi þrjár greinar í mánuði næstu þrjá mánuðina, í febrúar, mars og apríl, fyrir vefritið. Lesendahópur vefritsins fer sífellt stækkandi og er því talin góð auglýsing fyrir svæðið sem er talið geta haft margvísleg jákvæð áhrif.

Menningar-og ferðamálaráð hafnar styrkbeiðninni og óskar umsækjanda góðs gengis.

4. Norræna félagið í Vestur-Barð sækir um styrk að upphæð 400 þúsund krónum vegna verkefnisins Tengsl og vinabæjarheimsóknir.

Sótt er um styrk fyrir ferðakostnaði vegna vinabæjarheimsókna fyrir tvo fulltrúa Norræna félagsins og tvö ungmenni úr sveitarfélaginu.

Menningar-og ferðamálaráð hafnar styrkbeiðninni og óskar umsækjanda góðs gengis.

María Ósk Óskarsdóttir vék af fundi.

5. Þjóðbúningafélagið Auður á sunnanverðum Vestfjörðum sækir um styrk að upphæð 120 þúsund krónum.

Félagið stendur fyrir námskeiði þar sem markmiðið er að kenna námskeiðsgestum að sauma íslenska þjóðbúninginn. Fenginn er kennari til að koma vestur og sótt er um styrk fyrir húsaleigu í FHP ásamt ferðakostnaði og gistingu fyrir kennara.

Menningar-og ferðamálaráð samþykkir að veita styrk að upphæð 60 þúsund krónum.

María Ósk Óskarsdóttir kom aftur inn á fundinn.

Svanhvít Sjöfn Skjaldarsdóttir vék af fundi og tók formaður við fundarritun.

6. Flak ehf. sækir um styrk að upphæð 100 þúsund krónum vegna verkefnisins Ljósmyndasýning á FLAK.

FLAK hefur sankað að sér þúsundum gamalla ljósmynda í samstarfi við Ljósmyndasafn Vestur-Barðastrandasýslu og er markmiðið að varðveita og sýna þessi menningarverðmæti. Áætlað er að nota þennan efnivið og setja upp nokkrar mismunandi sýningar með ákveðnum þemum. Áður hefur verið sett upp sýningin sem bar heitið Af láði og legi þar sem þemað var sjávartengdar svipmyndir frá Patreksfirði teknar um miðbik 20.aldar. Ekki liggur nákvæmlega fyrir hvert þema næstu sýningar verður en það mun beinast að húsakynnum og mannlífi bæjarins.

Menningar- og ferðamálaráð samþykkir að veita verkefninu styrk að upphæð 100 þúsund krónum.

Svanhvít Sjöfn Skjaldardóttir kom aftur inn á fundinn og tók við fundarritun.

Alda Hrannardóttir forstöðumaður bókasafnanna í Vesturbyggð kom inn á fundinn og kynnti starfsemi bókasafnanna. Farið var yfir gestakomur, uppbyggingu skólabókasafna, samstarf milli byggðakjarna og starf með eldri borgurum, svo eitthvað sé nefnt.

Menningar-og ferðamálaráð þakkar Öldu fyrir kynninguna og fagnar þróun og uppbyggingu bókasafnanna á svæðinu.