Skipulags og umhverfisráð #52

Trúnaðaryfirlýsing lögð fram. Viðstaddir nefndarmenn undirrituðu yfirlýsinguna.

Erindi frá Bjarna S. Hákonarsyni. Í erindinu er óskað eftir stofnun lóðar úr landi Haga, Barðaströnd(139802). Nýstofnuð lóð skal bera heitið Hagabúð og er að stærð 7.409 m2.

Skipulags- og umhverfisráð Vesturbyggðar samþykkir erindið og felur byggingarfulltrúa að vinna málið áfram.

Erindi frá Rafstöðinni, félagasamtök dagsett 16. október 2018. Í erindinu er sótt um framkvæmdaleyfi vegna aðstöðu fyrir ferða- og útivistarfólk við Rafstöðina í Bíldudal.
Framkvæmdasjóður ferðamannastaða styrkti gerð bílastæða með upplýsingaskilti og hreinlætisaðstöðu við Rafstöðina í Bíldudal. Að auki styrkti Vegagerðin verkefnið úr styrkvegasjóði. Í ljósi þessara styrkja ákvað félagið að gera tillögu að breytingu á núverandi útafkeyrslu við Rafstöðina og færa hana á svipaðan stað og hún var upphaflega. Meðfylgjandi erindinu er uppdráttur sem sýnir fyrirhugaðar breytingar á aðkomu.

Skipulags- og umhverfisráð samþykkir að skipulagsfulltrúa verði heimilt að veita framkvæmdaleyfi sbr. 13. gr. skipulagslaga nr. 123/2010 þegar samþykki Vegagerðarinnar liggur fyrir. Sækja þarf sérstaklega um þjónustu við salernin hjá bæjarráði.

Erindi frá Vesturbyggð, dagsett 16. október 2018 þar sem óskað er eftir framkvæmdaleyfi fyrir efnisvinnslu, Tagli Bíldudal.

Áætlað er að vinna grjót í grjótvarnir sem og kjarna, heildarmagn er um 30.000m3.
Ekki er verið að raska óröskuðu svæði þar sem áður hefur verið unnið efni úr sömu námu. Berg verður losað með sprengingum. Lögun námunnar verður regluleg og gengið verður frá henni sléttri og afvatnaðri, fláar snyrtilegir og lausir við hrunhættu. Náman er skilgreind í Aðalskipulagi Vesturbyggðar 2006-2018 sem E18.

Skipulags- og umhverfisráð mælir með að gefið verði út framkvæmdaleyfi sbr. 13. gr. skipulagslaga nr. 123/2010 vegna efnisvinnslu í Tagli, þar sem um er að ræða námu sem þegar er opin og umfangið þannig að hún er ekki háð umhverfismati.

Drög að erindisbréfi Skipulags- og umhverfisráðs lagt fram til kynningar.

Skipulagsfulltrúi fór yfir stöðu vinnu við endurskoðun aðalskipulags Vesturbyggðar.