Hvað er að frétta af félagsmiðstöðvunum?
Í Vesturbyggð eru starfræktar tvær félagsmiðstöðvar fyrir ungmenni á aldrinum 13-16 ára. Önnur félagsmiðstöðin er staðsett á Bíldudal og heitir Dímon, hin félagsmiðstöðin er staðsett á Patreksfirði og heitir Vest-End. Þær eru opnar tvö kvöld í viku, tvo tíma í senn.
Skrifað: 12. mars 2024
Í dag, þriðjudaginn 12. mars, liggur leið þeirra á Reykhóla þar sem þau munu í fyrsta skipti fara á SamVest, en þar koma saman ungmenni frá Vesturlandi og stórum hluta Vestfjarða. SamVest er söngkeppni þar sem valdir eru fulltrúar sem stíga svo á svið í Laugardalshöll á söngvakeppni Samfés og er því um að ræða undankeppni á Reykhólum. Að henni lokinni verður haldið ball.
Andvökunótt
Krakkarnir í félagsmiðstöðvunum fara á hverju vori á SamFestinginn sem er stórt ball í Laugardalshöll. Venja hefur verið að safna áheitum með andvökunótt. Þetta árið var andvökunóttin haldin aðfaranótt laugardagsins 2. mars og gekk ljómandi vel. Þar gerðu krakkarnir ýmislegt skemmtilegt til að halda sér vakandi, en þau meðal annars skreyttu taupoka sem þau munu síðan gefa sínum hverfisverslunum, skreyttu bókamerki sem þau munu færa bókasöfnunum á svæðinu og einnig voru nokkrar ruslatunnur skreyttar sem settar verða upp hér og þar um þorpið.
Hvað er að frétta? er nýr liður á heimasíðunni þar sem birtar verða fréttir frá starfsstöðvum og stofnunum sveitarfélagsins.
