Fræðslu og æskulýðsráð #60

Lagt fram bréf um lokanir í leikskólum Vesturbyggðar. Í bréfinu eru beiðnir undirritaðar af öllum skólastjórnendum í Vesturbyggð um tvennt. Annars vegar er um að ræða beiðni um að framvegis verði leikskólar lokaðir á milli jóla og nýárs og hins vegar, með hliðsjón af nýjum kjarasamningum, beiðni um að leikskólar verði lokaðir í sex vikur samfleytt yfir sumur, frá byrjun júlí þar til um miðjan ágúst. Beiðnin er til komin til að komast hjá raski á störfum stofnananna vegna útafstandandi sumarleyfa starfsmanna við núverandi skipulag. Óskað er eftir að breytingarnar taki gildi strax og gildi þar með um sumarlokun 2020, til vara er sótt um að breytingarnar taki gildi þannig að lokað verði á milli jóla og nýárs frá og með 2020-2021 og 6 vikna lokun 2021.

Ráðið leggur til að halda áfram með lokun á milli jóla og nýárs. Jafnframt telur ráðið að óæskilegt sé að breyta sumarlokun 2020 en að skoða þurfi vel sumarlokun 2021 með tilliti til nýrra kjarasamninga.

Málinu vísað áfram til bæjarráðs.

Farið var yfir breytingar á dagatölum frá síðasta fundi í stuttu máli. Skóladagatal Patreksskóla 2020-2021 er samþykkt af ráðinu.

Með þeim lokunum sem gert er ráð fyrir á dagatali leikskóladeildar Patreksskóla 2020-2021 hefur ráðið áhyggjur af því að um of marga lokunardaga sé að ræða og úrræði foreldra af skornum skammti.

Málinu vísað til bæjarráðs.

Leikskólastjóri á Arakletti fór yfir breytingar á dagatalinu frá síðasta fundi í stuttu máli. Dagatalið er samþykkt. Komi til þess að sumarlokun verði lengd í sex vikur í stað fjögurra færast síðustu tvær vikur á leikskóladagatal 2021-2022.

Skólastjóri Bíldudalsskóla fór yfir breytingar á dagatalinu frá síðasta fundi í stuttu máli. Dagatalið er samþykkt.

Skólastjórnendur skiluðu skýrslum um stöðu á menntastofnunum sínum. Farið yfir þær til kynningar. Fræðslu- og æskulýðsráð Vesturbyggðar vill þakka skólastjórnendum, kennurum og öðru starfsfólki leik- og grunnskóla sveitarfélagsins fyrir metnaðarfullt og óeigingjarnt starf við þessar erfiðu aðstæður. Ljóst er að ástandið hefur reynt á bæði nemendur og kennara en það dylst engum að tekist hefur verið á við verkefnið af jákvæðni og vilja til þess að gera það besta úr aðstæðum.

Lagt fyrir bréf frá Sambandi Íslenskra Sveitarfélaga um starf Tónlistarskóla á tímum farsóttar.

Lagt fyrir bréf frá Íþrótta- og Ólympíusamband Íslands. Sambandið hvetur sveitarfélög til að styðja við bakið á sínum félögum á erfiðum tímum.