Velferðarráðuneytið áform um sameiningu heilbrigðisstofnana

Til máls tók: Forseti.
Lögð var fram ályktun:”Bæjarstjórn fagnar þeirri ákvörðun að fallið hafi verið frá sameiningu heilbrigðistofnana á Vestfjörðum.“
Bæjarstjórn samþykkir ályktunina samhljóða.

Lagt fram bréf frá Velferðarráðuneytinu dagsett 25. september 2013 varðandi áform um sameiningu heilbrigðisstofnana innan heilbrigðisumdæma þar sem tilkynnt er um fyrirhugaða sameiningu Heilbrigðisstofnunarinnar á Patreksfirði við Heilbrigðisstofnun Vestfjarða á Ísafirði.

Bæjarráð Vesturbyggðar mótmælir harðlega boðuðum sameiningum heilbrigðisstofnana sem veikja enn frekar grunnstoðir samfélaganna allt í kringum landið og minnka öryggi íbúa. Bæjarráð Vesturbyggðar bendir auk þess á að útilokað er að eiga faglegt samstarf við Heilbrigðisstofnunina á Ísafirði 9 mánuði á ári vegna samgönguleysis, allt eins væri hægt að vera í samstarfi við Fjórðungssjúkrahúsið í Neskaupsstað eða á Akureyri.

Boðuð sameining er einungis til þess fallin að auka enn á einhæfni í atvinnulífi á svæðinu og fækka atvinnutækifærum í heimabyggð. Í ljósi fyrirheita núverandi ríkisstjórnar um eflingu byggða, þá er rétt að benda á mikilvægt hlutverk hins opinbera við að halda úti þjónustu í nærsamfélaginu. Erfitt er að sjá hverju slík sameining á að skila, öðru en fækkun starfa í viðkvæmu samfélagi. Bæjarráð Vesturbyggðar hafnar því alfarið öllum hugmyndum um sameiningu Heilbrigðisstofnunarinnar á Patreksfirði og Heilbrigðisstofnunarinnar á Ísafirði en ítrekar fyrri boð og erindi til heilbrigðisráðherra, dagsettu 29. júlí 2013 þar sem óskað er eftir viðræðum um endurbætur á HSP og yfirtöku sveitarfélagsins á rekstri stofnunarinnar.

Með yfirtöku sveitarfélagsins á rekstri heilbrigðisþjónustu á sunnanverðum Vestfjörðum skapast mörg tækifæri í samþættingu þjónustu við íbúa í samstarfi við Félagsþjónustu Vestur-Barðastrandarsýslu. Möguleiki er á að auka þjónustustigið og efla faglegt starf með sérhæfðu starfsfólki þar sem horft er heildstætt á hvert mál fyrir sig þar sem heilsugæsla og félagsþjónusta vinna saman að bestu lausn mála.

Bæjarráð Vesturbyggðar ítrekar mikilvægi þess að Velferðaráðuneytið hefji nú þegar undirbúning að brýnum endurbótum á aðstöðu á Heilbrigðisstofnuninni á Patreksfirði og lýsir sig jafnframt reiðubúið til að hefja viðræður um yfirtöku á rekstrinum.