Skipulags og umhverfisráð #111

Tekin fyrir aftur umsókn Orkubús Vestfjarða Ohf. um lóð undir spennistöð við Þúfneyri í Patreksfirði. Spennistöðin er ætluð til landtengingar fóðurpramma fyrir laxeldi. Erindið var tekið fyrir á 110. fundi skipulags- og umhverfisráðs þann 11. október s.l. Á þeim fundi lagði ráðið til nýja staðsetningu utar á eyrinni. Orkubúi Vestfjarða hugnast ekki sú staðsetning m.t.t. ofanflóðahættu og grjóthruns og óskar eftir nýrri staðsetningu neðan við vatn á eyrinni.Friðbjörn S. Ottósson vék af fundi.

Skipulags- og umhverfisráð stendur við bókun frá 110. fundi ráðsins varðandi staðsetningu lóðar undir spennistöð við Þúfneyri og samþykkir ekki ósk um breytta staðsetningu.

Friðbjörn S. Ottósson kom aftur inn á fundinn.

Erindi frá Eflu ehf. f.h. Landsnets, dags. 30. október 2023. Í erindinu er sótt um samþykki byggingaráforma vegna byggingar nýs tengivirkishúss að Járnhól 8, Bíldudal.

Þakgerð og þakhalli byggingarinnar er ekki í samræmi við ákvæði gildandi deiliskipulags og þá er gert ráð fyrir bráðabirgðatengingu að byggingunni frá Bíldudalsvegi.

Skipulags- og umhverfisráð samþykkir byggingaráformin. Ráðið metur sem svo að áform um breytta þakgerð og þakhalla kalli ekki á grenndarkynningu þar sem þau varða ekki hagsmuni annarra en sveitarfélagsins og/eða umsækjanda sbr. 3. mgr. 44. gr. skipulagslaga nr. 123/2010.

Erindi frá Ólafi H Sigurþórssyni f.h. Sigurþórs L. Sigurðssonar, dags. 19. september 2023. Í erindinu er þess óskað að sveitarfélagið lagfæri bílastæði sem stendur á opnu svæði milli Dalbrautar 48 og 50 svo að fleiri bílar komist fyrir á stæðinu, þetta myndi auka umfeðraröryggi á svæðinu þar sem bílar þyrftu þá ekki að standa við götuna. Þá er þess óskað að eigandi Dalbrautar 50 fái heimild til að merkja eitt af stæðunum sem einkastæði.

Skipulags- og umhverfisráð tekur jákvætt í að lagfært verði bílastæðið á milli Dalbrautar 48 og 50, ráðið fellst þó ekki á að bílastæðið verði merkt sem einkastæði þar sem bílastæðið stendur í bæjarlandinu. Ráðið vísar málinu áfram til sviðsstjóra umhverfis- og framkvæmdasviðs.

Lögð fram umsókn Árna Kópssonar dagsett 26.10.2023 þar sem sótt er um framkvæmdaleyfi fyrir borun eftir köldu vatni í Dufansdal.

Skipulags- og umhverfisráð mælist til að bæjarstjórn Vesturbyggðar samþykki að veitt verði framkvæmdaleyfi til borunar eftir köldu vatni sbr. umsókn. Skipulags- og umhverfisráð metur að framkvæmdin sé þess eðlis að heimilt sé að falla frá grenndarkynningu þar sem framkvæmdin varði ekki hagsmuni annarra en sveitarfélagsins og/eða umsækjanda. Þá verði skipulagfulltrúa falið að gefa út framkvæmdaleyfið.

Lögð fram umsókn Gunnars Ingva Bjarnasonar dagsett 24.10.2023 þar sem sótt er um framkvæmdaleyfi fyrir aðkomuvegi að frístundalóðunum að Sælulundi og Sjónarhól á Barðaströnd. Með umókninni fylgja samþykki Vegagerðarinnar sem og landeiganda Haga fyrir tengingunni.

Skipulags- og umhverfisráð mælist til að bæjarstjórn Vesturbyggðar samþykki að veitt verði framkvæmdaleyfi fyrir aðkomuveginum sbr. umsókn. Skipulags- og umhverfisráð metur að framkvæmdin sé þess eðlis að heimilt sé að falla frá grenndarkynningu þar sem framkvæmdin varði ekki hagsmuni annarra en sveitarfélagsins og/eða umsækjanda enda liggi fyrir samþykki landeigenda og Vegagerðarinnar. Þá verði skipulagfulltrúa falið að gefa út framkvæmdaleyfið.

Lögð fram til kynningar drög að umferðarreglum innan þéttbýlis í Vesturbyggð sem nú eru í vinnslu, skjalið er unnið af umhverfis- og framkvæmdasviði Vesturbyggðar. Í reglunum er m.a. lagður til nýr hámarkshraði, þar sem hann er færður úr hálfum í heilan tug.

Tekið fyrir eftir grenndarkynningu breyting á deiliskipulagi Langholt-Krossholt. Breytingin var grenndarkynnt frá 18. septemeber til 16. október 2023. Fyrir liggur umsögn Minjastofnunar sem gerði enga athugasemd sem og athugasemd frá Heimi Ingvarssyni og Valdísi Ragnarsdóttur sem gerðu athugasemd við breytta veglagningu.

Í athugasemd Heimis Ingvarssonar og Valdísar M. Ragnarsdóttur var lýst yfir áhyggjum af staðsetningu aðkomuvegar að sumarhúsa- og smábýlalóðum á Langholti, áhyggjur voru af ónæði, ryki,og drullumengun alveg við húsið. Ráðið leggur til að aðkomuvegur verði færður við SV horn lóðarinnar eins og lóðamerki sveitarfélagsins leyfa og telur að þannig verði komið til móts við athugasemdina eins og kostur er.

Skipulags- og umhverfisráð leggur til við bæjarstjórn að skipulagsfulltrúa verði falið að svara þeim sem gerðu athugasemdir og að tillagan fái málsmeðferð í samræmi við 2. mgr. 43. gr. skipulagslaga nr. 123/2010.

Tekin fyrir tillaga að breytingu á deiliskipulagi Bíldudalshafnar. Breytingin felst í því að sameinaðar eru lóðir Strandgötu 14a, 14c og 14d í eina lóð undir heitinu Strandgata 14a. Strandgata 10-12 er minnkuð og hýsir nú einungis vatnshreinsistöð og geyma tengda meltuvinnslu. Í skipulaginu er lagt til að lóð sem áður var Strandgata 14e verði að Strandgötu 14c.

Skipulags- og umhverfisráð leggur til að húsnúmerum verði breytt samkvæmt eftirfarandi í skipulaginu:
Núverandi Strandgata 10-12 verði Strandgata 8.
Strandgata 14A verðir Strandgata 10.
Strandgata 14B verði Strandgata 12.
Strandgata 14C verði Hafnarteigur 4B.

Skipulags- og umhverfisráð leggur til við hafna- og atvinnumálaráð að tillagan verði samþykkt m.v. ofangreint og tillagan verði afgreidd skv. 1. mgr. 41. gr. skipulagslaga nr. 123/2010.

Lagður fram tölvupóstur Umhverfis-, orku- og loftslagsráðuneytis varðandi mál nr. 216/2023, "Skýrsla um mat á þörf fyrir varnarvirki og viðbúnað vegna ofanflóðahættu á atvinnusvæðum á Íslandi" dags. 1. nóvember 2023. í tölvupóstinum er óskað umsagnar.

Skipulags- og umhverfisráð felur byggingarfulltrúa að senda inn umsögn í samræmi við umræður á fundinum.

Lagður fram tölvupóstur frá Ísafjarðarbæ, dags. 20.október 2023. Í tölvupóstinum er óskað umsagnar vegna breytingar á aðalskipulagi Ísafjarðarbæjar 2008-2020 og nýs deiliskipulags fyrir Hvítasand í landi Þórustaða - baðstaður.

Skipulags- og umhverfisráð gerir ekki athugasemdir við lýsinguna.