Bæjarráð #870

Gerður Björk Sveinsdóttir, sviðsstjóri fjármála- og stjórnsýslu fór yfir stöðu rekstrar fyrir fyrstu þrjá mánuði ársins.

Lögð var fram verkefnatillaga frá KPMG. Tillagan felur í sér yfirferð á núverandi stöðu Vesturbyggðar og áætlun sveitarfélagsins til næstu 4 ára. Samanburð við önnur sveitarfélög og aðstoð við að móta heildarsýn um framtíð sveitafélagsins í fjármálum til næstu ára. Kostnaður við verkefnið er frá 2,7 milljónum - 3,2 milljónum. Verkefnið rúmast innan fjárhagsáætlunar Vesturbyggðar.
Bæjarráð felur bæjarstjóra að gera samning við KPMG á grundvelli verkefnatillögunnar.
Verkefnið er liður í því að bregðast við neikvæðri rekstrarniðurstöðu ársins 2018.

Umræður um gjaldskrár Vesturbyggðar 2020, vísað til nefnda og sviða Vesturbyggðar til umsagnar. Farið yfir helstu þætti ramma og forsendur við gerð fjárhagsáætlunar 2020.
Drög að fjárfestingaáætlun Vesturbyggðar fyrir 2020-2023 verði unnin samhliða úttekt á rekstri Vesturbyggðar.

Lögð fram útboðsgögn dags. 24. apríl 2019 í slátt og hirðingu á Patreksfirði 2019. Eitt tilboð barst í verkið upp á tæpar 7,3 milljónir króna. Sviðsstjóri umhverfis- og framkvæmda kom inn á fundinn og fór yfir tilboðið og bar saman við kostnaðaráætlun.

Bæjarráð hafnar tilboðinu en leggur til að leitað verði samninga við tilboðsgjafa um verkið.

Lagt fyrir erindi dags. 29. apríl sl. frá undirbúningsnefnd Bíldudals Grænna þar sem óskað er eftir styrk ofl. vegna bæjarhátíðarinnar Bíldudals grænar árið 2019.
Bæjarráð felur bæjarstjóra að gera samning við Bíldudals Grænar á grundvelli umræðna á fundinum.

Lögð fyrir styrkbeiðni dags. 13. febrúar sl. frá Skógræktarfélagi Patreksfjarðar þar sem félagið óskar eftir fjárstuðningi til félagsins. Vesturbyggð hefur styrkt Skógræktarfélag Íslands um 700.000 þúsund á ári undanfarin ár vegna verkefnis sem unnið er í samvinnu við Skógræktina á Bíldudal og Skógræktina á Patreksfirði.
Bæjarráð Vesturbyggðar felur bæjarstjóra að ræða við bréfritara á grundvelli umræðna á fundinum.

Lagt fyrir erindi dags. 12. maí 2019 frá foreldrum og forráðamönnum barna sem búa á Barðaströnd, þar sem þess er óskað að Vesturbyggð stofni og sjái um rekstur leikskólasels í Birkimel.

Bæjarráð telur að ekki sé unnt að opna leikskólasel á Barðaströnd og ítrekar fyrri bókun þar sem fram kemur að auglýst verði eftir dagforeldri á Barðaströnd.

Lagður fyrir tölvupóstur forstöðumanns Háskólaseturs Vestfjarða dags. 30. apríl 2019 þar sem óskað er eftir skipun fulltrúa frá stofnaðilum ásamt varamanni.

Bæjarráð skipar Rebekku Hilmarsdóttur aðalmann og Þórkötlu Soffíu Ólafsdóttur varamann og felur bæjarstjóra að svara bréfritara.

Tekið fyrir erindi Vesturbyggð, lóðir í þéttbýli þar sem skipulags og umhverfisráð lagði til við bæjarstjórn að deiliskipulag íbúabyggðar við Lönguhlíð á Bíldudal verði klárað en enn vantar að láta vinna fornleifaskráningu fyrir svæðið svo að hægt sé að auglýsa skipulagið.
Bæjarstjórn samþykkt tillöguna og vísaði henni til bæjarráðs til gerðar viðauka. Kostnaðurinn við vinnuna er áætlaður 450.000 og rúmast innan fjárhagsáætlunar og er því ekki þörf á gerð viðauka.

Lagt fyrir til kynningar bréf Umhverfisstofnunar dags. 7. maí 2019 þar sem þar sem vakin er athygli á aðgerðum úr verkefninu græn skref.

Lagt fram til kynningar bréf Sigurðar H. Helgasonar og Guðrúnar Birnu Finnsdóttur, f.h. fjármála- og efnahagsráðuneytis, dagsett 3. maí sl., með upplýsingum vegna laga um opinber innkaup og breytingar er varða sveitarfélög.
Unnið er að uppfærslu á innkaupareglum Vesturbyggðar.

Lögð fram til kynningar fundargerð nr. 120 NAVE - Náttúrustofa Vestfjarða.