Hafna- og atvinnumálaráð #53

Hafnarstjóri upplýsti um þær breytingar sem eru á nýtingu Verbúðarinnar við Patrekshöfn. Skriða bókaútgáfa hefur nú leigt hluta af neðstu hæð hússins fyrir prentsmiðju, þann part sem var undir „Karlar í skúrum“. Þau tæki sem fylgdu „Körlum í skúrum“ voru færð í rýmið við hliðina á og verið er að skoða leiðir til að halda verkefninu „Karlar í skúrum“ áfram, en upphaflega var það verkefni á vegum Rauða Krossins. Þá er stefnt að því að útbúa votrými fyrir rannsóknir samhliða rekstri Vatneyrarbúðar sem einnig yrði staðsett á 1. hæðinni.Bæjarstjóri Vesturbyggðar kom inn á fundinn undir þessum lið.

Hafna- og atvinnumálaráð fagnar því að meira líf sé að bætast við húsnæðið, en leggur áherslu á að öflug menningarstarfsemi verði til staðar í því húsnæði sem hefur verið leigt undir veitinga- og menningarrekstur frá árinu 2018. Hafna- og atvinnumálaráð felur hafnarstjóra að vinna áfram að þeim verkefnum sem rædd voru á fundinum.

Tekin fyrir tillaga að breytingu á deiliskipulagi hafnar- og þjónustusvæðis á Patreksfirði. Tillagan felur í sér skilgreiningu á fjórum íbúðarlóðum við Þórsgötu neðan við Mýrar á svæði sem skilgreint er sem ÍB1 í gildandi Aðalskipulagi Vesturbyggðar 2018-2035.

Skipulags- og umhverfisráð lagði til á 110. fundi sínum þann 11.október að í skilmálum verði texta breytt á þá leið að einnig verði heimilt að byggja einbýlishús á lóðunum.

Hafna- og atvinnumálaráð leggur til að skilyrt verði í skipulaginu að húsin verði öll á tveimur hæðum og stöllun á milli húsa eðlileg.

Hafna- og atvinnumálaráð leggur til við bæjarstjórn að tillagan fái málsmeðferð skv. 1. mgr. 43. gr. skipulagslaga nr. 123/2010.

Bæjarstjóri Vesturbyggðar vék af fundi.

Lagður fram til kynningar tölvupóstur frá Innviðaráðuneytinu dags. 3. október sl. þar sem óskað er umsagnar um breytingu á lögum um skipulag haf- og strandsvæða nr. 88-2018.

Hafna- og atvinnumálaráð felur hafnarstjóra að senda inn umsögn í takt við umræður á fundinum.

Lögð fram drög að uppfærðri gjaldskrá hafnasjóðs Vesturbyggðar fyrir 2024.

Lagt fram til kynningar yfirlit yfir samstarfsfundi Hafnasambands Íslands og fiskistofu.

Lögð fram fundargerð 456. fundar stjórnar Hafnasambands Íslands til kynningar.