Umsókn um styrk úr Fiskeldissjóði 2021

Lögð fram til kynningar auglýsing Fiskeldissjóðs sem birt var á heimasíðu Stjórnarráðs Íslands, ásamt reglugerð um sjóðinn, starfsreglur stjórnar og úthlutunarreglur sjóðsins vegna umsókna um styrki fyrir árið 2021, en umsóknarfrestur rennur út 30. ágúst kl. 16.00.

Lagðar fram til kynningar umsóknir í fiskeldissjóð. Eftirtaldar umsóknir voru sendar til sjóðsins:

- Gönguvænni Patreksfjörður
- Frumhönnun fyrir bæjarmynd Bíldudals - gömlu húsin og sundlaug
- Heildarendurskoðun á vatnsöryggi fyrir Patreksfjörð og Bíldudal
- Framkvæmdir við að fjarlægja Azbest lögn í Bíldudal
- Frumhönnum Kolabryggjunnar á Patreksfirði

Lagður fram tölvupóstar frá atvinnuvega- og nýsköpunarráðuneytinu vegna úthlutunar framlaga úr fiskeldissjóði 2021. Óskað hefur verið eftir rökstuðningi vegna úthlutunarinnar.

Bæjarráð gerir alvarlega athugasemd við úthlutun úr fiskeldissjóði 2021. Af fimm umsóknum Vesturbyggðar var þremur synjað og tvær lækkaðar verulega. Þá gerir bæjarráð athugasemd við að aðeins minnihluti tekna í sjóðnum rennur til sveitarfélaga á Vestfjörðum en Vesturbyggð hefur staðið í innviðauppbyggingu vegna fiskeldis síðan árið 2010. Þá ítrekar bæjarráð fyrri umsagnir sveitarfélagsins þar sem athugasemdir hafa verið gerðar um fyrirkomulag við útdeilingu tekna vegna gjaldtöku af fiskeldi í gegnum fiskeldissjóð. Í umsögnum sveitarfélagsins hefur ítrekað verið bent á að, í samræmi við álit nefndar um stefnu í auðlindamálum sem og tillögur í skýrslu starfshóps sjávarútvegs- og landbúnaðarráðherra um stefnumótun í fiskeldi frá 21. ágúst 2017, að stærstum hluta gjaldsins ætti að vera ráðstafað til þeirra landsvæða sem hafa aðkomu að fiskeldi í sjókvíum, eða 85% af innheimtu gjaldi. Ljóst er af úthlutun fiskeldissjóðs 2021 að útdeiling tekna af gjaldtöku af fiskeldi í sjó sé ekki í samræmi við fullyrðingar í greinagerð laga um töku gjalds vegna fiskeldis í sjó og fiskeldissjóð nr. 89/2019, þar sem kom fram að samhliða uppbyggingu fiskeldis munu kröfur um innviðauppbyggingu og þjónustu í viðkomandi sveitarfélögum aukast. Þannig má gera ráð fyrir auknum útgjöldum ef efla þarf samfélagsþjónustu við íbúa og bæta samgöngur. Tekjustofnar sveitarfélaga eru takmarkaðir og því mikilvægt að þær tekjur sem falla til á grundvelli laganna renni til sveitarfélaganna þar sem nýting auðlindarinnar og starfsemi fyrirtækja í fiskeldi fer fram og þörfin til uppbyggingar þjónustu er einna mest.

Bæjarráð Vesturbyggðar hvetur komandi ríkisstjórn til að endurskoða fyrirkomulagið og tryggja í auknara mæli að þær tekjur sem skapast verði sannarlega eftir þar sem fiskeldið og verðmætasköpunin fer fram.

Lögð fram drög að samningum við fiskeldissjóð vegna úthlutunar styrkja úr sjóðnum.

Bæjarráð staðfestir drögin og felur bæjarstjóra að undirrita samningana fyrir hönd Vesturbyggðar.