Skipulags og umhverfisráð #62

Erindi frá Ingva Ó. Bjarnasyni, Neðri-Arnórsstöðum. Í erindinu er óskað eftir stofnun lóðar úr landi Efri-Arnórsstaða, Barðaströnd(139777). Áætluð stærð lóðar er 3106 m2. Umsókninni fylgir lóðarblað.

Skipulags- og umhverfisráð samþykkir erindið fyrir sitt leyti og vísar erindinu áfram til bæjarstjórnar.

Erindi frá Vestur Restaurant ehf. Í erindinu er sótt um stöðuleyfi fyrir allt að 20ft frystigám við A-horn Aðalstrætis 110 , gámurinn er ætlaður fyrir matvöru til eldunar á staðnum. Erindinu fylgir samþykki lóðarhafa sem og teikning er sýnir fyrirhugaða staðsetningu gámsins.

Skipulags- og umhverfisráð samþykkir veitingu stöðuleyfis í 12 mánuði fyrir gámnum, gámurinn skal vera snyrtilegur og falla að umhverfi. Skipulags- og umhverfisráð hvetur umsækjanda til að huga að varanlegri lausn á gildistíma stöðuleyfisins.

Erindi frá Guðmundi P. Halldórssyni, Mýrum Patreksfirði. Í erindinu er lýst yfir áhyggjum af miklum umferðarhraða við Mýrarnar. Barnmargt sé orðið í götunni og bílum sé lagt beggja vegna götunnar. Bréfritari leggur til hraðahindranir við innri enda götunnar sem og fyrir miðju til að takmarka hraðann.

Skipulags- og umhverfisráð þakkar bréfritara fyrir erindið. Mikilvægt er að fara yfir umferðaröryggismál í sveitarfélaginu, ráðið leggur til við sviðsstjóra umhverfis- og framkvæmdasviðs að umferðarskilti verði yfirfarin sem og tillögur gerðar að nýjum hraðahindrunum í þéttbýlinu með fjárhagsáætlun ársins 2020 í huga.

Erindi frá Ingólfi M. Ingvasyni. Í erindinu er óskað eftir nýjum lóðarleigusamningi vegna Stekka 13, Patreksfirði.

Skipulags- og umhverfisráð samþykkir að gerður verði nýr lóðarleigusamningur við húseigendur að Stekkum 13, Patreksfirði. Erindinu vísað áfram til bæjarstjórnar.

Erindi frá Þórð J. Skúlasyni f.h. Orkubús Vestfjarða ohf. Í erindinu er sótt um byggingarleyfi fyrir hraðhleðslustöð við Hótel Flókalund, Barðaströnd. Erindi fylgja teikningar, ljósmyndir sem og samþykki Umhverfisstofnunar, Ríkiseigna, Vegagerðarinnar og heilbrigðiseftirlits Vestfjarða.

Skipulags- og umhverfisráð samþykkir áformin og telur ekki vera þörf á grenndarkynningu þar sem þau varða ekki hagsmuni annarra en lóðarhafa og sveitarfélagsins sjálfs og fyrir liggur samþykki Vegagerðarinnar og Umhverfisstofnunar.

Erindi frá Guðbjarti Á. Ólafssyni f.h. eigenda Strandgötu 19, Patreksfirði. Í erindinu er sótt um byggingarleyfi fyrir stækkun á bakhúsi Strandgötu 19, Patreksfirði. Fyrirhuguð stækkun er 38,4 m2. Erindinu fyljga aðal- og séruppdrættir dags. 10.07.2019 sem og umsögn Minjastofnunar Íslands þar sem áformin eru samþykkt, enda hafi breytingin ekki áhrif á ásýnd hússins frá götu.

Ekki liggur fyrir deiliskipulag af svæðinu, skipulags- og umhverfisráð samþykkir að grenndarkynna áformin skv. 44. gr. skipulagslaga nr. 123/2010 og felur skipulagsfulltrúa að grenndarkynna framkvæmdina.

Tekið fyrir eftir auglýsingu breyting á deiliskipulagi Bíludalshafnar, aukið nýtingarhlutfall.
Breytingartillagan var grenndarkynnt frá 8. ágúst til 6. september, þar sem fyrir liggur samþykki aðliggjandi lóðarhafa og umsagnir liggja fyrir er auglýsingartími styttur eins og heimild er fyrir í 44. gr skipulagslaga nr. 123/2010. Óskað var umsagnar frá Heilbrigðiseftirliti Vestfjarða sem gerði engar athugasemdir við breytingartillöguna. Athugasemd barst frá Skrímslasetrinu og frá Kalkþörungaverksmiðjunni. Athugasemdir leiddu ekki til efnislegra breytinga á tillögunni en þess verður gætt við uppsetningu að samráð verði haft við nærliggjandi lóðarhafa um bestu mögulega útfærslu.

Skipulags- og umhverfisráð samþykkir breytinguna á deiliskipulaginu og vísar erindinu áfram til hafna- og atvinnumálaráðs.

Erindi frá Jens H. Valdimarssyni f.h. Bernódus ehf. Í erindinu er sótt um byggingarlóðina að Arnarbakka 5, Bíldudal til byggingar einbýlishúss.

Skipulags- og umhverfisráð tekur jákvætt í erindið og leggur til við bæjarstjórn að lóðinni verði úthlutað til umsækjenda.