Bæjarstjórn #377

Bæjarstjóri Vesturbyggðar fór yfir helstu verkefni síðustu vikna.

Til máls tóku: Forseti og bæjarstjóri.

Lagt fram til seinni umræðu frumvarp að fjárhagsáætlun Vesturbyggðar og stofnana fyrir árið 2023 ásamt 3ja ára áætlun 2024-2026.

Rekstur A - og B- hluta fyrir fjármagnsliði er jákvæður um rúmar 252 millj.kr., fjármagnsliðir eru um 170 millj.kr. og rekstrarniðurstaðan jákvæð um 81,6 millj.kr. Veltufé frá rekstri er 317,9 millj.kr. Fjárfestingar eru 452 millj.kr., afborganir langtímalána 182 millj.kr. og lántökur 320 millj.kr.

Rekstur A - hluta fyrir fjármagnsliði er jákvæður um 104,6 millj.kr., fjármagnsliðir eru rúmar 124 millj.kr. og rekstrarniðurstaðan neikvæð um rúmar 19,8 millj. kr. Veltufé frá rekstri er um 148 millj. kr. Fjárfestingar eru 315,8 millj.kr. og afborganir langtímalána 133,7 millj.kr.

Með breytingu sem gerð var á reglugerð nr. 1212/2015 um bókhald, fjárhagsáætlanir og ársreikninga sveitarfélaga á árinu 2021, þurfa sveitarfélög nú að færa í samantekin reikningsskil sín, sem og fjárhagsáætlanir, hlutdeild sína í byggðasamlögum, sameignarfélögum, sameignarfyrirtækjum og öðrum félögum með ótakmarkaðri ábyrgð.

Í tilviki Vesturbyggðar á þetta við um eftirtalin samrekstrarverkefni:

- Byggðasamlag Vestfjarða um málefni fatlaðs fólks
- Fjórðungssamband Vestfirðinga
- Náttúrustofa Vestfjarða

Áætlanir framangreindra rekstrareininga fyrir árin 2023 til 2026 um rekstur, efnahag og sjóðsstreymi liggja ekki fyrir og því hafa áhrif þeirra ekki verið verið færð í fjárhagsáætlun sveitarfélagsins. Þegar samþykktar fjárhagsáætlanir framangreindra rekstrareininga liggja fyrir á viðeigandi formi er fyrirhugað að gerður verði viðauki við fjárhagsáætlun sveitarfélagsins fyrir árin 2023 til 2026.

Til máls tóku: Forseti, bæjarstjóra, ÁS og GE.

Fjárhagsáætlun Vesturbyggðar er samþykkt samhljóða.

Lagðar fyrir gjaldskrár Vesturbyggðar fyrir árið 2023. Gjaldskrár eru óbreyttar frá fyrri umræðu í bæjarstjórn.

Til máls tóku: Forseti og bæjarstjóri.

Forseti bar staðfestingu gjaldskránna upp til atkvæðagreiðslu.

Bæjarstjórn staðfestir samhljóða gjaldskrár Vesturbyggðar fyrir árið 2023.

Lagður fyrir viðauki 9 við fjárhagsáætlun 2022. Viðaukinn var tekin fyrir á 953. fundi bæjarráðs þar sem hann var samþykktur og vísað áfram til bæjarstjórnar til samþykktar.

Viðaukinn er lagður fyrir vegna verkefna sem ekki næst að klára á fjárhagsárinu 2022 í hafnarsjóði og verður gert ráð fyrir á áætlun sveitarfélagsins á árinu 2023. Fjárhæðin sem færist yfir á næsta fjárhagsár er 17 m.kr. Í viðaukanum er jafnframt leiðrétt fyrir verkefnum sem styrkveitingar fengust í fiskeldissjóði. Í vatnsveitu er verkefni uppá 5,5 m.kr. frestað en það mun ekki klárast á árinu en á móti færist styrkur frá fiskeldissjóði. Færð er styrkfjárhæð uppá 900 þ. á móti kostnaði uppá sömu upphæð vegna hönnunar á gönguleið fyrir ofan leikskólann Araklett á Patreksfirði að öðru leiti verður verkefnið klárað á árinu 2023 og styrkur færður á móti, gert er ráð fyrir því í áætlun 2023. Bætt er við fjármagni til kaupa á leiktækjum fyrir Patreksfjörð og Bíldudal uppá 3,5 m.kr. Útgjaldaaukanum er mætt með hækkun á útsvarstekjum sem eru umfram áætlun 2023_mv.

Viðaukinn hefur ekki áhrif á rekstrarniðurstöðuna. Handbært fé í A og B hluta hækkar um 17 m.kr. Viðaukinn hreyfir ekki handbært fé í A hluta.

Til máls tóku: Forseti og ÁS.

Bæjarstjórn smþykkir viðaukann samhljóða.

Siðareglur kjörinna fulltrúa voru samþykktar árið 2013 og hafa haldið gildi sínu síðan. Í upphafi hvers kjörtímabils skal sveitarstjórn meta hvort ástæða sé til að endurskoða siðareglurnar sbr. 1. mgr. 29. gr. sveitarstjórnarlaga 138/2011.

Bæjarráð tók málið fyrir á 953. fundi sínum og taldi siðareglur kjörinna fulltrúa í Vesturbyggð ekki þarfnast endurskoðunar og lagði því til við bæjarstjórn að siðareglurnar haldi gildi sínu.

Til máls tók: Forseti

Bæjarstjórn staðfestir bókun bæjarráðs og telur siðareglur kjörinna fulltrúa í Vesturbyggð ekki þarfnast endurskoðunar.

Samþykkt samhljóða.

Lögð fram samþykkt um kjör fulltrúa í nefndum, ráðum og stjórnum Vesturbyggðar.

Til máls tóku: Forseti og bæjarstjóri.

Bæjarstjórn staðfestir samþykkt um kjör fulltrúa í nefndum, ráðum og stjórnum Vesturbyggðar.

Lagt er fram bréf Umhverfisstofnunar, dags. 1. nóvember s.l. þar sem óskað er eftir tilnefningu í vatnasvæðanefnd í samræmi við lög nr. 36/2011 og reglugerð nr. 935/2011 um stjórn vatnamála.

Bæjarráð tók málið fyrir á 953. fundi sínum þar sem tekið var undir tillögu frá 66. fundi samráðsnefndar Vesturbyggðar og Tálknafjarðarhrepps, frá 1. desember sl. um að Vesturbyggð tilnefni Þórkötlu S. Ólafsdóttur sem aðalmann í vatnasvæðanefnd og Tálknafjarðarhreppur tilnefni Ólaf Þór Ólafsson sem varamann hennar.

Bæjarráð vísaði tilnefningu í vatnasvæðanefnd til staðfestingar í bæjarstjórn.

Til máls tók: Forseti

Bæjarstórn staðfestir tilnefninguna sem gerð var á 66. fundi samráðsnefndar Vesturbyggðar og Tálknafjarðarhrepps.

Lagt er fram bréf Sambands íslenskra sveitarfélaga, dags. 18. nóvember sl., þar sem óskað er eftir því að sveitarfélögin endurnýi fullnaðarumboð Sambandsins til kjaraviðræðna auk þess að veita Sambandinu upplýsingar um laun og önnur starfskjör starfsmanna sveitarfélagsins.

Bæjarráð tók málið fyrir á 953. fundi sínum þar sem lagt var til við bæjarstjórn að endurnýja fullnaðarumboð Sambands íslenskra sveitarfélaga til kjaraviðræðna.

Til máls tók: Forseti

Bæjarstjórn Vesturbyggðar veitir Sambandi íslenskra sveitarfélaga fullnaðarumboð til kjaraviðræðana.

Samþykkt samhljóða.

Erindi frá Lögmannsstofu Ólafs Björnssonar, dags. 22.11.2022. Í erindinu er óskað umsagnar Vesturbyggðar varðandi fyrirhugaða stofnun lögbýlis á jörðinni Seftjörn II. Umsóknin er í samræmi við staðfest aðalskipulag.

Skipulags- og umhverfisráð tók málið fyrir á 101. fundi sínum þar sem það gerði ekki athugasemd við stofnun lögbýlis en telur æskilegt að föst búseta fylgi stofnun lögbýlis. Ráðið veitti jákvæða umsögn um umsóknina og lagði þá ákvörðun fyrir bæjarstjórn til staðfestingar.

Til máls tók: Forseti

Bæjarstjórn Vesturbyggðar staðfestir bókun skipulags- og umhverfisráðs.

Tekið fyrir afgreiðslubréf Skipulagsstofnunar, dagsett 21. nóvember 2022 ásamt leiðréttum skipulagsgögnum þar sem tekið hefur verið tillit til athugasemda Skipulagsstofnunar.

Gerðar voru breytingar á skipulagsgögnum sem fela í sér eftirfarandi atriði:
Fjölbýlishús var fellt úr skipulagi í stað þess var einu parhúsi í 2. áfanga breytt í fjögurra íbúða raðhús og einu þriggja íbúða raðhúsi breytt í fjögurra íbúða raðhús. Ástæða breytingarinnar var sú að ekki var gert ráð fyrir fjölbýli samkvæmt aðalskipulagi en einnig var byggingareitur fyrir fjölbýli felldur út þar sem hann var innan 50 metra fjarlægðarmarka frá Litlueyrará. Íbúðum innan svæðisins fækkaði um eina við þessa breytingu en verða eftir breytingu 58.
Felldur var út reitur um hreinsistöð þar gert er ráð fyrir rotþróm við hvert hús, þegar byrjað verður á 2. áfanga þá skal koma fyrir hreinsistöð sem þjóna skal öllu hverfinu. Kallar það á breytingu á deiliskipulagi sem og á Aðalskipulagi Vesturbyggðar 2019-2035.
Stígakerfi breytt á því svæði þar sem áður var gert ráð fyrir byggingarreit fyrir fjölbýli.
Kafli um veitukerfi uppfærður m.t.t. breytinga.

Skipulags- og umhverfisráð tók málið fyrir á 101. fundi sínum þar sem það lagði til við bæjarstjórn að breytingarnar sem gerðar hafa verið á tillögunni verði samþykktar og skipulagsfulltrúa falin fullnaðarafgreiðsla á deilskipulaginu í samræmi við 42. gr. skipulagslaga nr. 123/2010.

Til máls tók: Forseti

Bæjarstjórn samþykkir breytingarnar og felur skipulagsfulltrúa að afgreiða deiliskipulagið í samræmi við 42. gr. skipulagslaga nr. 123/2010.

Á 374. fundi bæjarstjórnar sem haldinn var 21. september sl. voru lögð fram drög að samningi um umdæmisráð barnaverndar á landsbyggðinni ásamt viðaukum. Á fundinum var bæjarstjóra falið að vinna að framgangi málsins og undirrita samning um rekstur umdæmisráðs barnaverndar á landsbyggðinni fyrir hönd Vesturbyggðar.

Nú er lögð fram tillaga að nýjum samningi um umdæmiráðið. Bæjarstjóri leggur til við bæjarstjórn að fela bæjarstjóra að undirrita samning um umdæmisráð landsbyggðar hvort sem ákveðið verði að ganga til samninga á grundvelli hins nýja samnings, nefnd leið 1 eða samningsins sem lagður var fram á 374. fundi bæjarstjórnar, nefnd leið 2.

Til máls tóku: Forseti og bæjarstjóri

Samþykkt samhljóða.

Lögð fram til kynningar fundargerð 953. fundar bæjarráðs, fundurinn var haldinn 12. desember 2022. Fundargerðin er í 28 liðum.

Til máls tók: Forseti

Lögð fram til kynningar fundargerð 25. fundar menningar- og ferðamálaráðs, fundurinn var haldinn 6. desember 2022. Fundargerðin er í 3 liðum.

Til máls tók: Forseti

Lögð fram til kynningar fundargerð 66. fundar samráðsnefndar Vesturbyggðar og Tálknafjarðarhrepps, fundurinn var haldinn 1. desember 2022. Fundargerðin er í 8 liðum.

Til máls tóku: Forseti, GE og bæjarstjóri.

Lögð fram til kynningar fundargerð 44. fundar hafna- og atvinnumálaráðs, fundurinn var haldinn 12. desember 2022. Fundargerðin er í 8 liðum.

Til máls tók: Forseti

Lögð fram til kynningar fundargerð 101. fundar skipulags- og umhverfisráðs, fundurinn var haldinn 13. desember 2022. Fundargerðin er í 6 liðum.

Til máls tók: Forseti